去唔到旅行好多人都會揀喺香港Book酒店Staycation，但香港啲酒店房有幾大大家都知，加上依家個個都去酒店Staycation，你又去埋一份好似好隨波逐流咁呀可？其實喺香港可以Staycation嘅地方絕對唔止酒店，就連英洞時期風格建築、兩層獨立屋都有！

Mansion on Cheung Chau Island (~HK$9,200/晚)

去長洲住渡假屋大家去得多，但原來長洲都有棟英治時代建築風格嘅大宅可以出租。呢間「Mansion on Cheung Chau Island」位於碼頭20分步程嘅長洲東南部份，圍牆內有自家花園，建築物外觀充滿歐洲風情，內部樓高兩層，一樓係玄關、開放式廚房、飯廳及客廳；一樓就係火爐海景主人套房加三個客房，其中一個仲係專為小朋友們而設嘅高低鋪，外圍仲有飽覽山景、海景嘅露台。但要講到最吸引嘅，就係有「Jacuzzi」、日光浴椅嘅超大露台，再上仲有個有BBQ設備嘅天台。齋睇相根本就唔會覺得呢棟嘢係存在喺香港！

Contemporary Hong Kong Village House (~HK$5,200/晚)

如果你鍾意較為現代嘅風格，咁位於石澳泳灘2分鐘步程嘅「Contemporary Hong Kong Village House」就應該更適合你。村屋格局雖然冇上面嗰棟咁開揚，但依然有花園及大量生活空間，地下層大量使用落地破璃窗加強空間感，亦令整間屋都充滿日光，白牆配黑色金屬框嘅外觀亦簡潔現代。全屋兩個有獨立廁所嘅睡房，再加天台。享受海邊生活嘅就最啱啦。

Funky Pad & Amazing Views in the heart of Lamma (~HK$4,200/晚)

如果你心目中嘅Staycation係可以同情人靜靜地睇日落，咁位於南丫島嘅呢個出租單位就應該滿足到你。單位最煞食嘅當然係個正對夕陽海景嘅景觀，天台更有日光浴椅讓你安坐欣賞。室內就傢私用色亦充滿渡假味道，有開放廚房、三個睡房兩個廁所。