「工業風」係近年非常流行嘅室內設計風格，你有睇開啲室內裝修專頁就知架啦，個個都要整啲水泥牆、鐵通木板書架、貨櫃裝飾呀之類咁，不過美國有一家人就唔係用貨櫃黎做裝飾咁簡單，而係將成個貨櫃放入屋！

圖片：Paul Michael Davis

呢間屋位於美國華盛頓州默瑟島之上，原本建於1960年代，目前就住咗一家五口，當中包括三個年輕兒子。由於三個仔需要大量活動空間，又要諗下將來大個啲房點分，所以家人就決定委託Paul Michael Davis建築公司為間屋重新裝修。而建築公司諗到嘅辦法，就係拆咗原本已經頗為殘舊嘅車庫，將佢改建成兩層高嘅新建築，令成間屋多咗一個客房。

除此之外，佢哋亦於屋內及屋外放咗兩個翻新貨櫃入去，其中一個作為「Mudroom」使用，亦即係用黎放出完街嘅污糟衫褲鞋襪嘅空間，另一個就放咗去後花園作多用途室。另外起居空間與客飯廳之間亦加上一道以貨櫃改建而成嘅巨型趟門，配上白色牆身、木地板及深色家居，營造出簡約工業風家居。

圖片：Paul Michael Davis

值得一提嘅係建築公司指，由於預算所限，除咗以上講嘅改動之外，佢哋對間屋其他地方其實冇做過啲咩。更值得一提嘅係，睇相就會發現佢成個屋企嘅範圍大到離哂譜。