《Candy Crush》近年雖已失去當年嘅熱度，但多得一班忠實玩家（例如唔少人嘅阿媽）支持，整體營運情況仍非常良好。不過近日就有指遊戲開發商「King」近日於母公司Microsoft令下解僱200名員工，而最諷刺嘅係該批員工嘅工作，將會被員工們親手開發嘅AI取代。令人進一步關注AI盛行之後人類嘅去處。

話說《Candy Crush》開發商「King」於2016年被Activision Blizzard收購，而後者又於2023年被Microsoft收購，換言之「King」現時為Microsoft旗下嘅遊戲開發商之一。而早前Microsoft宣佈會裁員9,000人，當中主要對旗下遊戲開發商動刀，而「King」亦因此要裁員10%，即約200人左右。

而據《mobilegamer.biz》及《Eurogamers》等外媒引述多名內部人士消息，指被裁員工將集中於中層人員，當中重災區為關卡設計、玩家體驗及故事撰寫，以及玩家研究等部門，其中關卡設計部門以及故事擴寫部門更係幾乎連根拔起。最諷刺嘅係上述兩個部門過去數月嘅其中一個主要工作，就係開發出能更快完成工作嘅AI工具，結果開發完成後AI卻反過來取代真人。

內部人士批評用AI取代真人係「絕對荒謬」，並指出公司嘅經營狀況其實非常良好，是次裁員係只顧效率及公司營利。另外亦有指「King」針對過去曾對公司提出批評嘅員工，利用今次裁員清除異見；另一消息人士就指出「King」嘅人力資源管理一直都有問題，《Candy Crush》開發團隊一直處於「緩慢但穩定嘅流失」以及不停嘅改組，「King嘅HR咁多年黎都同屎一樣」、「係HR只為保護公司而非員工嘅極端例子」。

資料來源：Eurogamers、mobilegamer.biz