講起日本刀或劍，好多人第一時間都係諗起劍道，而劍道同今次介紹嘅居合道雖然都係用劍，但兩者分別都幾大。「居合道係日本武術嘅一種，已經有接近一千年歷史，同劍道一樣都係劍術技巧，不過練習方法唔同。劍道練習時會著護甲同用竹人劍對打，而居合的練習方法就是道服和日本刀，練習就分為定制、試斬同對打。」由於修練方法唔同，亦有人話居合係武術，而劍道就係運動，以便大家知道兩者分別。

居合練習以套路為主，練習唔同構(架式)、步法、拔刀收刀同攻守動作，而部份流派更有試斬同對打，而今次為我哋介紹同示範居合嘅戶山流，就有齊3種練習。試斬部份就會斬草蓆，實踐用刀嘅技巧同控制。組太刀(對戰)將套路嘅概念應用到實戰，由二人對打，有啲流派會用真刀或木刀對戰，不過就唔會斬落去，有少少似演武式嘅攻守練習，點到即止。香港戶山流嘅對戰就會戴頭盔同以特製嘅刀對打練習，真係會好似劍道咁埋牙打，以感受實戰嘅節奏同緊張感。雖然只係用海綿劍，但被打中仍然係會痛。

我大約99年左右開始接觸居合，不過到目前仍係半桶水，而諗返以前學居合嘅年代，真係有唔少人因為睇完《浪客劍心》而想學，直頭有人上堂時會問有冇逆刃刀，亦有cosplay住嚟練刀嘅人，在場邊研究動漫招式。可能大家都認為呢種行為同心態都十分小學雞，但駱師兄話其實都有正面幫助︰「相比劍道，居合道喺香港唔係太普遍，所以唔少人學居合前，都真係受到動漫同電影嘅影響。其實每個人開始學居合嘅原因都唔同，我都係睇漫畫時好鍾意忍者先令我對日本刀產生興趣。其實只要對日本文化或日本武術有興趣，我哋都好歡迎，唔代表因動漫而產生興趣係唔啱。當然我哋學嘅動作技巧同動漫係有出入，冇咁誇張同神化。」

學居合並唔需要武術基礎，而且年齡層好闊，由中學生到退休人士都有。「居合係學習點樣控制一把劍，體能需求唔大，男女都適合。每個居合練習其實都比著重較精神上嘅修練，因為我哋練武術嘅實際用途機會非常細。雖然拳腳武術都可以自衛，但劍真係好少機會用得著，所以我哋練習時要用開鋒嘅刀，就係想大家有一集中嘅心去練習。」

已經練咗20年居合嘅駱師兄，話香港近年愈來愈人學居合，不過仍然係一個小眾活動，而且由於練習要用刀，而且每把刀都有成2尺幾，練習時係需要有一定嘅空間先安全，所以好難喺公眾地方練習，就算係政府嘅活動室都唔係咁好。基於土地問題，所以香港嘅居合發展係有限制。

香港早喺7、80年代已經有人練習居合，但當時都係小數人獨立練習，直到90年代先有練習居合嘅組織出現，香港都有唔同流派出現，而且有部份流派更可以考段，所以有唔少初學者都會猶豫到底要學邊一流派。「考段係一個指標，居合不同流派都有自己段位要求，就好似我哋會亦有兩個段位考試，首先會係日本戶山流居合聯盟考試，另一個就係我師父旗谷嘉辰老師嘅誠斬會考試，對於試斬要求極高。考段視乎你想要一個資格定係技術磨練，如果真係好想要資格，就可以揀較易嘅段位考試。」雖然唔同流派考嘅試都唔用，但仍有一個公開試畀唔同流派考試，而呢個考試就係「制定居合」。制定居合係由全日本劍道聯盟制訂，會進行居合12式考試，當中有立技同座技，唔需要進行斬蓆。

每個流派所教招式同內容都有分別，香港戶山流就可以學到套路、試斬同對戰，不過就有分階段。「第一個月都係安全意識訓練，學生會先用唔開鋒嘅刀學好套路，等識得控制把刀之後先可以試斬，我佢哋一星期有3堂，如果進度理想，新學生大約1個月就可以試斬。至於對戰要求就較高，可能要有一定技巧同體能先可以進行」。我一直以來都係練套路，以前甚至覺得冇必要試斬，但一斬之後就會發現自己問題多多，入刀角度同力度，每刀之間連繫同速度，都可以透過試斬觀察得到。如果一味靠蠻大力，其實可能會傷刀同傷到自己。

能夠拎住日本刀係居合道嘅魅力所在，咁到底點先係一把真正嘅居合刀呢？「一般居合練習用嘅刀叫打刀拵，主要由刃、鞘、柄、鐔同下緒組成，造型就冇動漫咁特別。我哋練習用嘅刀有分開鋒同冇開鋒，而冇開鋒嘅係叫做模擬刀，外型同真刀一樣，但刀身就以鐵或者合金製造，所以會較輕身，比較適合初學者。模擬刀好處除咗可以護初學者之外，亦能夠減少身邊人受傷嘅機會。」

由日本買刀當然質素好，而且手續亦唔算麻煩，上網買都可以直接寄到香港，不過一把好嘅日本刀售價實在唔係人人負擔得起，所以初學者都會選擇中國製嘅大陸刀。「目前大家練習嘅刀主要來自日本同大陸，日本刀同大陸刀嘅價錢，可以有15倍嘅距離，因為質素同製造方法唔同，但由於大陸刀價錢平，令初學者比較易負擔。大部份初學者都會先用大陸刀練習，到佢覺得有熱情先會投資到日本刀身上。」

講開買日本刀，我去過日本賣刀劍嘅地方見識過，基本上每把「真刀」都可以查到來源。點解要標明真刀？因為日本自從實施廢刀令之後，至今都係唔可以擁有真刀，但點解又有咁多開鋒嘅刀呢？原來有個灰色地帶，以美術刀劍代為名就可以買賣同擁有開鋒真刀，而且真刀由登記刀匠製造，兼且限制生產24把，所以每把真刀都特別珍貴。

其實我都有買過大陸刀，一般練習冇大問題，平衡感亦幾好，不過駱師兄解釋大陸刀較難承受頻密斬擊使用，而且日後維修麻煩，事關禁止入口，所以就寄唔到返去。另外，買大陸刀貨不對辦是常識吧。撇除日本同大陸，amazon嘅外國刀亦可以考慮，雖然上面有好多其實都係大陸刀，但有少部份係美國刀廠造，質素會比較好，而且價錢兩、三千已經唔錯。如果大家想知多啲刀劍資料，可以inbox我facebook page，大家交流一下。