- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
「呀下～我要飛往天上 呀下～像那天鳥翱翔」一直以來，人類都好似一隻冇翼嘅雀仔，渴望自由自在喺空中飛翔，可惜天生冇翼，說好的Redbull都冇送你一對翼，只好發白日夢，夢想自己終有一日曉飛。不過今時今日，似乎除咗飛機之外，暫時冇嘢可以滿足到我哋「一飛衝天去」嘅欲望，究竟「哪一天我們會飛」呢？ 其實唔使等到22世紀，都唔使等到基因突變，只需要你夠勇而又撞啱天氣好，唔搭飛機我地都一樣可以飛上天空，冇翼又有乜好怕喎！我哋仲有滑翔傘嘛！ | |
| |
| 唔好以為香港地方細細就冇得畀你飛，其實香港一共有8個合法地點可以畀你玩滑翔傘︰ 浪茄灣、北潭坳、八仙嶺、馬鞍山、西灣、石澳、九龍坑山、大嶼山南。每個場地都有固定嘅飛行範圍同埋高度限制，超越咗就算違法。而Mean娜今次就帶大家喺馬鞍山空中一帶飽覽香港美景！一齊飛呀～～～！ | |
| |
Mean娜事前就喺網上搵資料，滑翔傘可以分為單人或雙人，單人就一定需要證書先可以自己飛上天，如果好似Mean娜咁冇證書，就要搵個合資格教練先可以進行雙人飛行體驗。於是Mean娜就預約滑翔傘教練阿星，等佢安排一切。 由於玩滑翔傘要視乎天氣，如果有機會落雨就唔可以飛行，因為怕雨水會影響滑翔傘嘅形狀以及重量，所以教練會前一日先Confirm究竟拍攝當日適唔適合玩滑翔傘，如果唔適合，就要另擇吉日。至於地點方面，都唔輪到我哋話事，因為玩滑翔傘仲要留意風力同風向，一切都要由教練決定去邊度飛，去邊度落。 另外，拍攝前一日阿星就好細心提醒Mean娜各樣準備事項︰水、麵包、行山裝、防曬等等，仲話佢有Gopro借出，到時只需要畀張32GB Misco SD Card佢就得。 呢次滑翔傘初體驗，阿星就安排Mean娜去馬鞍山起機，由馬鞍山村行上去，大約40分鐘左右就到目的地昂平高原，上到去，就見到空中有好多滑翔傘！真係超級興奮！！！ | |
| |
| |
| 昂平高原係香港少數嘅高山草原之一（高約400米），由於地勢高而且寬闊平坦，所以非常適合玩滑翔傘！ | |
| |
要注意一點，由於現時香港冇法例規定喺香港玩滑翔傘一定要買第三者保險，亦冇保險公司提供滑翔傘嘅第三者保險，所以玩之前一定要搵個有牌嘅合資格教練，兼且簽埋「生死狀」，有晒心理準備先可以去飛。 玩滑翔傘前，當然要做足安全措施。唔需要擔心自己著錯出事，因為教練會一手一腳幫你戴安全帽、護膝、護肘等等，只需要揹起座袋，練習飛上天點樣舒服坐喺座袋上欣賞風景就夠。另外教練會畀枝連住自拍棍嘅Gopro你，如果唔識如何伸縮，飛之前可以好似Mean娜咁拉長縮短拉長縮短拉長縮短咁練習一下。 | |
| |
| |
| |
| |
| 著好裝備，教練就會教你飛前要點跑同埋點拉出座墊，放心，唔會好難，騰雞如Mean娜都做得到，然後教練就會同你確認飛行路線，至於邊度降落，就要睇風向、風力，本來阿星同Mean娜講會原地飛原地落，但後來飛飛下發覺風力唔夠，結果直接喺西貢降落。 | |
| |
| 雖則學拉出座墊坐落去並唔難，但Mean娜想講坐咗落去就好難企返起身，所以就畀攝影師捕捉到我以下Kai樣XDDD | |
| |
| |
| |
| 唔好以為準備晒所有嘢就即時飛得，因為「萬事俱備 只欠東風」，我哋就一直等東風等咗好耐……好耐……期間緊張到Mean娜木口木面，就好似玩過山車咁，永遠都係等嘅時刻最得人驚。 | |
| |
| |
| 終於教練話有風可以飛！！！教練先將滑翔傘嘅傘體打開鋪地，然後靠風力將人升起，而Mean娜嘅任務係要一直抗衡向前跑，如果唔係就畀滑翔傘嘅力量拉走，不過Mean娜實在太輕盈（教練話），所以要搵多個教練幫手捉實Mean娜先可以成功升空！ | |
| |
| |
| Finally I believe I can fly～！飛上天係咩感覺？你一定未睇條片啦！快啲碌返上去睇咗先！ | |
| |
| |
後記︰Mean娜本身有少少畏高，坐摩天輪會淆底，高處望地面又會淆底，但飛上天嗰一刻又冇想像中咁驚，可能一來有教練陪住感覺安心，二來飛行途中都好穩定唔會有就跌就跌嘅感覺，加上其實畏高同畏高症係兩回事，畏高就好似Mean娜咁，身在高處覺得不安，先會產生恐懼，但如果你知道有足夠安全措施，自然就放心得多唔會驚；但如果持續出現過度或不合理嘅恐懼同焦慮，明知安全都驚到想即刻走，咁就有可能係畏高症，要衡量究竟玩唔玩到滑翔傘。 滑翔傘教練阿星聯絡方法： 電話: +852 6170 6615 (可用微信 / WhatsApp) |