呢兩三日周街都係精靈訓練員，你捉到比卡超，佢又捉到傻鴨，總之香港就變左純白鎮。咁莫耶斯呢？佢咪捉到黑貓囉！艾拿戴斯上星期六宣佈離隊執教英格蘭，新特蘭第二日就公佈莫耶斯接任執教，身為愛華頓傳奇教頭嘅佢喺曼聯同皇家蘇斯達都唔太順利，不過教新特蘭啦喎，又唔可以用呢兩三年嘅事睇死天才又搞唔掂嘅。

喺其他足球群組好多朋友都爭住抽莫耶斯水，覺得新一季買佢對家好快發達。又唔好咁老定，首先曼聯真係唔係咁易教，就算你幾唔鍾意曼聯都好，曼聯始終係體育記者嘅目光所在，有乜風吹草動都好易見報；二來佢係後費格遜年代第一個領隊，大家都好期待到底無咗費格遜之後嘅曼聯係點，所以個壓力真係唔細架。至於皇蘇，當時佢接手第一季嘅任務係要成功護級，最後皇蘇排12都叫任務完成，第二季無以為繼慘食無情雞都無法啦，始終西甲唔係莫耶斯熟悉嘅聯賽。不過天才都志氣可嘉，佢俾曼聯炒嗰時大把英超球會offer都無要，反而願意突破自己comfort zone去尋找挑戰，呢個都要俾少少respect莫天才既。

有跟開呢單新聞嘅大家應該都知，莫耶斯其實係英超史上贏波第四多嘅領隊，排喺佢前面嘅分別係費格遜、雲加同哈利列納，證明教返英超佢熟晒路。再講，新特蘭點都無曼聯咁矚目，外間都唔會對新特蘭咁大期望。而且當年接手愛華頓時，拖肥環境都係同而家新特蘭差唔多，莫天才最擅長係限米煮限飯，當年一接手愛華頓都平平地執咗唔少實而不華嘅球員，好似候活、李鐵、卡希爾咁，最後接手第二季愛華頓就用第七位完成賽季。後來更試過衝擊歐聯可惜外圍賽出局。而家愛華頓攻得又守得嘅愛爾蘭右閘史密斯高文都係佢帶去葛迪遜球場，身價仲要係六位數字咁大把。

圖片：Skysports

莫耶斯而家最緊要係同時間鬥快，因為而家都8月未到，轉會窗好快就完，但又唔好好似阿士東維拉咁亂買人，最後錢又使咗，嘢又做唔到就大件事。加埋下季英超變成知名領隊大戰，都算相當大挑戰，可能大家最期待就係莫耶斯帶領新特蘭重返奧脫福嗰日。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。