文青細個嘅時候屋企有部冇遙控嘅超古老嘅超古老大牛龜電視，佢嘅正面除咗個Mon，就係一排銀色、閃閃發光，寫住1、2、3、4等等等等嘅轉台掣，另外仲有條較大細聲嘅打橫推桿。每次你要轉台，都要起身行埋去電視前面撳返相應嘅掣，而當你撳落去嘅時候，原本嘅撳咗落去嗰個掣就會彈返上黎，發出清脆嘅「啪」一聲，非常解壓。

依家出嘅電視機雖然又薄又靚，但已經唔可以再提供呢種手感，有陣時都係一種可惜。但日本嘅DOSHISHA近期就推出咗一部懷舊電視，等大家重拾「啪啪啪」嘅樂趣。