每個年輕人心裡都會有句︰「I have a dream.」不過10個有9個都得把口，敢講唔敢做，一諗到可能會撞板，又或者困難重重，已經打晒退堂鼓。最後？咪又係做返個烚熟狗頭嘅打工仔囉。

明嘅，創業畢竟有風險，但如果你睇得準個市場，分分鐘先發圍嗰個就係你。今時今日I.T.業當道，唔少人投身I.T.行業，覺得發展潛能無極限。曾於理工大學同中文大學修讀I.T.嘅Phoenix同James，自細就想創業，佢哋見實體舖租金愈來愈貴，難以負擔；又見科技發展迅速，普及範圍漸大，未來商機有增無減，決定讀I.T賺返一筆。

向三萬蚊月薪說不

James大學時期已經開始搞網上小生意，幫人代購外國貨品，成績非常唔錯，於是畢業後一邊繼續I.T.事業，同時與好友Phoenix一齊幫人整網頁同App，維持生計；Phoenix畢業後則以銀行工作為正職，月入過三萬，雖然人工好好，但另一邊廂，眼見同James共同創立嘅網上生意發展蓬勃，知道他日必有出頭天，於是決心跳出高薪行業，全職與James做好老闆一職。

不一樣的情人節禮物

James與Phoenix自2010年開始成立網上生意，幫人整網頁、App等等，但大部分係商業性質為主。後來二人開始想搞啲新Idea，適逢情人節時萌生呢個念頭，當時有好多報導講述情侶間互送禮物嘅概況，其中有人買起一間花店送畀女友，令Phoenix印象深刻。於是二人開始反思，好多有新意嘅禮物都價格不菲，而且大部分偏向物質，難以達到長久之效。而愛情網頁呢個就夠晒新意，價錢又唔貴，仲可以長長久久一直經營下去。

為怕羞仔求愛發聲

將生意送給最愛

「愛愛網」有一條龍服務，由求愛到紀念到分手，都有完善安排。但除咗「愛愛網」，James同Phoenix仲有搞其他網頁。佢哋其中一個網叫「Webable(香港網上商機)」，做網上生意買賣，可以接手舊網站，又可以從0開始砌個新網，以自己網站為平台，進行買賣或轉介等生意。曾經有位男士，想向女友求婚，而女朋友一直希望創業做Wedding planner，於是該男士就將「愛愛網」Cross over「Webable」，送咗一盤生意畀女朋友。

想當初James同Phoenix有撩同學一齊創業，但好多人都冇信心於是拒絕。發展至今，二人已經擁有超過20個生意網站，其中包括「愛愛網」、「Webable」、「Jetso Wedding」、「Yobuy」等等，更成立多間公司，例如︰「腦巴打有限公司」、「創新天下有限公司」、「Fashion/PR有限公司」、「手機遊戲開發公司」等等。更於2013年獲得<< Capital Entrepreneur 資本企業家 >> 的「傑出創業家大獎」。可見創業之路有好多種，唔一定要有錢開舖先叫一門事業，網上商店都可以助你搵到真金白銀。