2018年亞運會目前正喺印尼雅加達舉行，而香港隊今屆派出多人參賽，其中游泳隊則有多達15女17男嘅團隊參戰。作為當中嘅大師姐，「淳美人」歐鎧淳亦都有隨隊參賽，而佢則透露今屆相信係佢最後參加嘅一屆亞運了。

現年26歲嘅歐鎧淳，近年都係港游泳隊嘅生招牌，除左佢好游得之外，當然仲有佢出眾嘅外型，但係大家對佢有幾深認識呢？知唔知佢心入面有咩諗法？今次就等我地帶你去了解多少少呢位「飛魚」嘅內心世界。

問：描述一下你的長大的地方及分享這個地方讓你感到驕傲的原因

淳：我係土生土長嘅香港人，出生於小康之家。我覺得香港最令我引以為傲嘅就係打不死嘅精神，及好有幹勁嘅活力，尤其係當我去過外國讀書，就更加感受得到，亦都睇得出香港人嘅個一種堅毅不屈、努力不懈嘅精神。

問：大多數人都會改變自己去適應呢個世界，感覺你並唔會選擇順從，而係不斷努力比世界認識瞭解你嘅唔同，呢個可能意味住你需要比常人付出更多嘅心血及汗水。一路走來，係啲咩嘅信念喺度支撐緊你呢？

淳：有時候都會好容易迷茫，係咪應該順從呢個世界會比較舒服呢？但係，如果每一個人都係順從，都服從呢個世界嘅話，咁呢個世界就會變得好悶。就正因為有好多唔同嘅人，唔同嘅元素存在喺呢個世界上面，先會令到呢個世界咁多不同，及多姿多彩。我相信自己只係咁多種色彩中嘅其中之一，可能不同嘅係，我喺香港呢個環境可能會特別一點，但係咁樣先可以令到其他人睇到你，亦都更加有自己自身存在嘅價值。

問：達到你而家所取得嘅成績及水準需要付出難以想象嘅精力，係咩令所有嘅付出變得值得？

淳：我覺得喺香港做運動員，尤其係我們呢個年齡，已經游左十幾年嘅運動員，再向前行其實前面係點，真係無人會知道，會唔會突然之間身體再唔能夠承受，而所有一路以黎嘅努力亦都白費，無人知道。所以其實都只得一個信字，相信自己可以做得到，然後排除所有困難，保養好自己，食好啲、訓好啲、休息好啲、專心啲，玩嘅事情都要放下，基本上係盲目地去順從自己可以做到更好呢個不確定因素嘅目標，我覺得其實咁樣係unreasonable的。

問：對個啲仍然喺度為自己夢想努力奮鬥嘅年輕人，你有咩經驗可以分享比他們呢？

淳：我相信每一個要堅持自己嘅夢想，去做自己想做、喜歡做嘅事嘅人都係困難重重的，因為你已經選擇左行一條比別人更加難行嘅路。希望都可以堅持啦，因為的確要自己去努力爭取賺回來，而無人會喺旁邊，唔係有人可以比到你，係要你自己爭取。因為如果係別人比你的話，咁已經說明別人已經有，但係如果係你自己爭取去創造出來的，咁先係屬於自己的。

問：有無一件你幾乎每日都堅持做嘅事情(甚至只係一件小事)，可能喺別人眼中會覺得不可思議，但係就令你嘅生活或職業帶黎巨大嘅影響？

淳：我由9歲開始游水，十幾年黎都望住個個池底，個條藍色嘅線、個啲粉藍色嘅階磚，不停咁游，個種忍耐沉悶嘅能力，相信喺好多人眼中都會覺得不可思議。