訪問羅鈞滿自然是因為近期羅氏進軍飲食界學人開甜品鋪曝光，又重現江湖。尤記得一句『做人別太羅鈞滿』深深印入網民包括小編的心中，過了兩年時間，到底呢位被大台解約的黑星變成點樣？可能並非每位讀者有興趣知道，不過對比炒佢的大台近況，其實羅鈞滿近況都唔係話太差，反而如果佢依然在大台做合約小藝員，可能更加大喊7聲。根據羅鈞滿的回憶，佢原本在解約前和大台仲有7年死約，即原本要為大台做多7年藝員角色，以而家大台近況連愛回家拍完都收皮的處境，我覺得羅君滿真係『羅翁失馬』焉知非福。

而家的羅鈞滿可能依然缺乏香港觀眾緣，但起碼係國內有劇拍，係電競隊領隊, 間中當下電競旁述、開自己的甜品鋪，跟住明星足球隊親善同盛傳有個唔簡單的好女友，生活應該比大台小演員時更充實。犯小事累累的羅君滿唔知是行運定咁唔小心，居然可以無條件解約唔駛賠唔駛罰，俗語謂執到啦。

當然和每一位入過大台的人討論，大家都必然會感謝大台給予的機會，畢竟大台唔止三根釘，確是培訓一個人成長的重要學堂。阿滿對於大台都係話心存感激。的確，又唔係大台負羅滿，只是佢自己為人處事唔夠成熟加上黑開有條路！不過會唔會否極泰來大難不死，過左呢關唔知仲有無機會敗者復活呢？我同阿滿接觸就feel到佢好積極，起碼好像是【活得比你更好】。

談到自己的過去，自然又一系列的認罪懺悔，羅滿過去小事連連，緋聞多多，被網民數落係算是七線奀星扮三線，不過論知名度，的確在羅鈞滿演藝旅途上，負面新聞反而令人記有佢的存在，一句做人別太羅鈞滿確是「滿」入民心。對醉駕佢自言好彩，起碼醉駕未有釀成更大的意外，造成任何人命的傷亡，都叫不幸中之大幸。而家睇返除左一切負面新聞，確實仲有人為當年星夢傳奇羅鈞滿被踢出四強感到少少可惜同不值........

講娛樂圈生存能力羅鈞滿比人感覺就係得罪人多稱呼人少，而且常常係唔適當時間出聲出事，不過照計羅鈞滿鐵指銅牙，能夠獨立係法庭自辯打官司仲要勝訊，無理由做人處事咁濕濟。可能對大台觀眾而言『呢度唔係法庭，我對眼就係證據！』講多錯多

羅鈞滿有樣野醒，總是溝到女，繼大家都好熟悉的新聞之花，而家又疑似被其他傳媒影到佢有個傳說中的富裕女友，對於現在的女友，羅滿無多講但追問佢前女友新聞之花張文采，佢就好認真話唔想再傷害到對方同對方的家庭，最後一次講呢件事，來個了結咁話。當然啦，明天會更好嘛，過左去就由得佢。

總結羅鈞滿的訪談，呢條友確是打不死仲充滿住「正能量」。好多時人有悲歡離合，月有陰晴圓缺，你又真係唔知衰到貼地是否真係代表未路，頂得住捱得過，絕處也可以逢生，或許我地都應該有羅鈞滿式的硬淨『做人就要羅鈞滿 -大台解約也不驚』。