一年一度嘅本地體育盛事渣打馬拉松今個星期日就舉行啦，各位跑手調整好狀態未先？

作為香港女子長跑代表，姚潔貞亦都將會參加今年嘅渣馬，不過因為去年生完BB，再加上仍然有啲少傷，所以佢今次只會參加半馬賽事。雖然係咁，佢仍然會係呢個組別嘅冠軍熱門之一，而佢自己則只係希望做到想要嘅時間，名次只係其次。

除左黎緊嘅渣馬，姚潔貞目光更遠，佢想再一次代表香港挑戰奧運，但面對嘅困難比上一屆更多，因為時間上嘅要求更苛刻，再加上其身體狀態亦都無上屆咁處於巔峰，但係佢仍然想接受呢個挑戰，盡力去衝奧運資格。

姚潔貞熱愛跑步，又曾經做護士，如今又生了一個BB，三樣野都係非常辛苦，咁究竟佢覺得邊樣對於自己黎講係最辛苦呢？答案係生BB。相信呢個對於作為媽媽嘅都一定會認同，除左要忍受生產期間嘅痛楚之外，陀BB期間嘅擔憂先係對呢位媽媽最大嘅折磨。

有唔少身邊嘅朋友都對呢位新手媽媽跑手有意見，甚至同佢講：「唔好再跑啦，專手湊BB啦，養好身體要緊。」但係姚潔貞唔想放棄，佢要挑戰自己，對於呢個行為佢自己都覺得非常瘋狂，但卻好想達成。

最後，作為專業跑手，姚潔貞亦都比左一啲意見比即將參加渣馬嘅朋友，想知嘅就即刻睇片啦！