個死字點寫－Supper Moment

文：MenClub jimjimmay　　圖：MenClub
POSTED ON 20 Apr 2015

「可能我哋都唔識個死字點寫！」

就係簡單一句，Supper Moment講出四個人能夠走埋一齊嘅原因。

的確，在這個年頭，要在被稱為「已死」的香港樂壇裡組band玩自己鍾意的音樂，

好易被宣佈「certified」。

Supper Moment，包括（左起）低音吉他手張祖光（CK）、主音陳仕燊（Sunny）、結他手梁燿鵬（阿雞）和鼓手陳鴻達（阿達），2010年正式出道。

你可能以為，音樂組合的訪問又是圍繞一堆講過900次的舊topics，即如「香港夾band好難捱」、「香港做音樂搵唔到食」、「香港樂壇已死」等等，寫出一幕幕夾band辛酸史。

實情是，我們不愛催淚彈。

香港仔，笑吓啦！

「上車」＝基本需要非里程碑

80後成功「上車」等「勵志」故事，不斷出現於各大報章之中，為層樓連早餐都放棄的，已非新鮮事。

四子身為80後，經歷過零收入，要維持生計只靠教授學生，Sunny回憶道︰
「諗起以前個band房好細，但夾硬間咗三個area，我哋有四個人，咁點算好呢？呢樣係一種藝術，點樣大家嘈住大家，即係你教唱歌時，我又彈緊結他，但又可以繼續教落去呢，最後就焗咗阿達上去另一個band房教，哈哈哈」

這個情況維持了三、四年，直至去年才開始穩定點。

去年收入先穩先，咁要在這個大時代置業，可以說是難過登天，Sunny就話︰「置業對我哋呢個年紀嘅人，係幾大嘅難關，但時代不斷變，唯有去適應大環境。當然，唔可以不斷要求政府提供空間，但至少，政府要提供一個我哋可以接觸到嘅門檻。」

「呢個唔係純粹成功與否嘅問題，係真係要住呀嘛，家陣就算租樓、排公屋，就算只係想要一個地方瞓都好有問題，而家唔係奢侈到話要住千萬半山豪宅喎！」

經常出現「上車」等於成功這類故事，阿達認為很大程度上是傳媒炒作

「報道會講到好似里程碑咁，其實呢樣只係基本需要。大家可以租樓，唔買樓都得，但唔知點解周圍氣氛影響到，將件事當作成功指標看待，呢樣我係好唔認同。」

「當然，呢種報導可以當做係希望工程嚟嘅，意思係人哋咁後生都買到樓，你都得，不過人哋有阿爸俾2000萬咁囉，或者日日食一塊面包，咁就儲到錢啦！當然，站在傳媒角度，搵呢類題材係好有gimmick，唔通講兩公婆打份『牛公』，正正常每月儲幾錢，跟住儲到首期買樓咁悶咩，呢個情況同颷高音一樣，颷得越高越好睇。」

Sunny再補充︰「某程度上，呢類問題係講緊取捨，大家對於快樂嘅指標都唔同，可能我覺得每日食一塊方包買到層樓我好快樂，但有人寧願花多少少錢，食兩個好味啲嘅面包會覺得過癮啲，呢個真係唔同嘅標準。而對於我哋四個嚟講，求求其其有個地方瞓，繼續夾到band，咁就ok架啦！」

訪問Supper Moment，可以笑足全場，佢哋不斷發放正能量

100萬左「除」右「除」

樓價、消費開支愈高，政治氣氛複雜等問題，要在香港生活似乎比10年前艱難得多。

早前興過講移民台灣，貪當地生活悠閒，費用唔算貴。早排有報道話，Supper Moment不斷接校園Show，一年穩袋百萬，咁樣袋袋吓，應該夠錢移民喎，阿達反駁「講到好勁咁，其實搵100萬點樣叫做勁，你諗吓我哋四個人『除』之餘，仲要同公司『除』，除除吓，其實最後同做M記差唔多，哈哈哈」

無諗移民費事嘈到人

「杜汶澤已經答咗，佢就話唔好去搞人哋，哈哈哈」Sunny講完，三子都大笑︰「即係唔好講人哋，我哋四個都幾嘈，去到破壞人哋寧靜生活就唔係幾好啦，又破壞香港人形象，哈哈哈。」

Sunny最多嘢講

結他手梁燿鵬（阿雞），好少講說話

黑猩猩有好有壞人類一樣

做創作，周圍搵靈感，對於近年「巴打」至愛觸及的題目︰「港女」又有何睇法？

阿達話「港女」唔係香港獨有，全世界都有衰人。

Sunny打了一個奇特比喻︰「你睇discovery channel，見到啲黑猩猩圍埋一堆，總會有幾隻係犯賤俾人打，只不過嗰啲係猩猩，你可以打佢，我哋係人類，唔會無端端走去打人哋咋嘛。我哋唔想專登標籤港男港女，而且人總有好有壞，好理所當然。」

小編試舉「港女」案例俾四子評理。較早前網上流傳有單case，被稱作港女經典，事緣有一對情侶結婚，禮金本身講好是五萬，點知中途女方有身咗，於是禮金方面即時要雙倍加至十萬，如果無十萬就唔駛旨意結婚兼要個BB，最終鬧翻，若然四子遇到呢單case，第一時間會有咩反應，阿達即時答︰「打去家計會問吓」（其他隊員即時笑到反艇）。