好多人話，今時今日嘅香港有病。每日打開新聞，就見到怪獸家長、土地問題、多次流會等等消息……係呀，大家都知道香港而家好唔對路，但又如何？大把媒體都隱惡揚善，嗲都唔敢嗲。That's why《毛記電視》呢個講人話講真話嘅另類傳媒，就殺出一條新血路，特別係佢嘅《六點半左右新聞報道》，更用幽默方式，道出香港嘅真實情況，令睇嘅人大呼︰「爽呀！」

當然，成功嘅新聞報道除咗新聞本身嘅價值外，主播嘅Presentation都會令成件事生色不少。我知～唔少Gentlemen都好留意盤菜瑩子、黃慘盈、利君牙、羅若 Off幾位可愛又有趣嘅女主播，但你又知唔知，其實佢哋背後都有個男人支撐加十卜，佢就係今次訪問嘅主角……《六點半左右新聞報道》嘅大腦兼愛國主播東方昇！呀，唔係，應該係王嘉偉至啱～

王嘉偉評「王嘉偉」

「其實我覺得我個人幾自閉，甚至會唔想對人。」雖然王嘉偉化作東方昇時表現好Active，但事實上，可能因為佢讀心理學嘅關係，好明白人類係點，覺得人係好複雜嘅生物，所以唔太鍾意「人類」。有空餘時間，都寧願一個人對住啲花花草草，自己諗嘢就算。

王嘉偉評「東方昇」

「我心目中嘅東方昇係一個幾癲嘅人，佢會做啲正常人唔會做嘅嘢，但當我投入咗東方昇呢個角色時，我覺得東方昇其實就係我嘅思想。」老實講，人都係有幾面，王嘉偉冇刻意設計東方昇呢個角色，因為東方昇就係王嘉偉嘅內心反映。

事實上，呢個時代好多人內心都想發聲，但基於社會眼光，我地都只會9縮唔敢出聲。王嘉偉同東方昇呢兩種人格，唔只雙重，仲傷重。因為現實社會中，不同於電視所見，我哋都只接受王嘉偉呢種沉默嘅人，而選擇傷害、攻擊敢作敢為嘅東方昇。

不過，王嘉偉同東方昇又唔係完全相反，起碼喺愛國呢一點，原來王嘉偉都真係愛國，唔似得大部分年輕人，會好抗拒中國。佢認為大家眼中嘅中國人之所以咁乞人憎，係因為隨住經濟發展，好多中國人已經變質。但喺中國其他地方，依然仲有好純樸、好有人情味嘅中國人，至少佢曾經親身接觸過呢類好人，所以唔應該以片概全去Judge全世界。

王嘉偉在香港的生存之道

如果有得揀，好多人都想做真正嘅自己。一睇東方昇呢個內心人物，就知王嘉偉其實絕不普通。之前喺其他訪問中，都有形容過王嘉偉係一個怪人，但喺王嘉偉心目中，你哋先奇怪︰「我其實唔覺得自己怪，咩叫正常呢？其實就對比返所有人，如果大家都係嗰類人，而你又唔係嗰類人，咁你就被評為Abnormal。」

咁作為一個大眾眼中嘅怪人，喺香港又可以點生存呢？「喺香港係辛苦架。其實任何人都可以好成功，睇你擺喺邊個環境同時空。好似一個唔擅於交際嘅人，喺香港可能會畀人話佢毒，但放喺北歐，地方大，唔需要點同人應酬，佢就可以好舒服，甚至可以有一番專業作為。」而王嘉偉就覺得，由於香港人唔太跳脫，所以佢呢種古靈精怪嘅人喺香港會受到好多局限，但咁代唔代表佢要妥協，當然係No啦，如果唔係你都唔會見到東方昇嘅出現。正正因為王嘉偉同一般香港人格格不入，先更顯佢好似漆黑中嘅螢火蟲一樣，咁鮮明，咁出眾！所以，做自己，是對的。

王嘉偉=新男神？

聽完王嘉偉呢番說話，有冇覺得忠於自己嘅男人好Charm？其實自從東方昇紅咗之後，好多男女男男女，都被佢深深吸引，覺得佢有咁多計仔，真係好有才華，好鬼男神。但原來，王嘉偉覺得︰「如果我係一個女仔，我會鍾意我自己，但我一定唔會同自己拍拖。因為我太自我中心，任何嘢都會諗咗自己先。」咁其實都冇好定唔好，最緊要人夾人啫，起碼王嘉偉都澄清，自己唔會自我中心到完全唔理對方感受，咁都Okay丫，同得新男神一齊，少少苦楚咪等於激勵囉～不過王嘉偉已經有自己嘅另一半，各位自問唔介意付出多於收穫嘅巴（？）絲打，都係繼續FF算吧啦～

後記︰Mean娜作為一個舊毛孩，重返雙子塔真係感觸良多。估唔到以前力量小小嘅毛孩，都可以勇於面對自己，承受外來批判，以致畀人抨擊到爆頭流血，去活出自己一片天空，成就咁型棍嘅《毛記電視》，東方昇，傷得更重都是值得的。更估唔到，Mean娜由一個以前《100毛》小編，變成MenClub「女神」之後，竟然可以回到毛孩基地去做訪問，仲有幸畀東方昇訪問返轉頭。想睇Mean娜嘅受訪片段的話，就睇你哋嘅反應喇～