提到真‧女神蔣怡Coco，可能你會不期然聯想到Model、高妹、Mixed（但其實人哋係江蘇人）、靚女同埋……「親吻我嘅右腳」。作為一位名模，Coco絕對係「出得廳堂」，但你又知唔知，鏡頭背後佢又有咩特別嘅新身份？人妻？媽媽？Nonononono～呢啲資訊太out喇，我要講嘅係佢藍帶廚師呢個新Title呀！

其實Coco去年就去咗倫敦追求自己嘅夢想，報讀法國藍帶廚藝學院，仲好威威咁以優異成績「Mention Bien」畢業於Grand Diplôme！邊個話今時今日美女就唔識煮嘢食架？Coco就身體力行咁證明畀大家睇，佢自己就係一個「入得廚房，出得廳堂」嘅美女廚神！

可能睇緊呢篇文嘅巴打會話︰「吓？！咪屈我喎！我從來冇話過靚女唔識煮嘢食喎！」係～可能你冇，但事實上大把人有咁嘅奇怪觀念，認為美女就一定「十指不沾陽春水」，搞到熱愛烹飪嘅Coco好唔忿氣︰「我煮嘢食都煮咗十幾年，一路覺得已經好有經驗，所有Home Cook都難唔到我，但係出去做嘢拍飲食節目或者煮少少嘢，永遠都唔會有人相信我係識煮嘢。就算我喺屋企請客，煮晒成枱，只要佢哋冇見到我喺廚房身水身汗成身油，都唔會信係我煮！」

對於自己廚藝有返咁上下自信，又咁鍾意煮嘢食嘅Coco而言，誤會佢唔識煮嘢食直頭係一大侮辱啦！所以佢成日都會向自己老公仔Complain，呻呻下，有次阿老公仔冇啦啦講咗句︰「不如你去藍帶讀書丫？你考個證返嚟人哋咪信囉～」雖然Coco當佢食花生講吓笑，但點知藍帶夢就係由呢句「笑話」開始。

話就話藍帶夢，但其實Coco細個並冇夢想過要做廚師，於是Mean娜就問︰「咁Coco你細個有咩夢想？」你知唔知Coco答咩？你知唔知佢答咩？佢話佢淨係夢想過將來男朋友要係賣西瓜！係咪好驚喜呀男士們？原來賣吓傻西瓜就可以列入女神心目中最佳男友嘅位置，機會嚟喇飛雲！（呀，不過Coco已經嫁咗人，仲有個好可愛嘅囡囡，唔使好似係，直頭係呀！）雖然Coco話想男友賣西瓜，但原來佢都係一個蠱惑女神，之所以夢想男友賣西瓜，原來係因為佢好鍾意食西瓜，佢仲補充多句︰「總之我嗰輪鍾意食乜嘢，就想將來男友賣乜嘢～」但Coco為食極都好，細個從來冇諗過要做廚。

嗱嗱嗱～係唔係公主病發作，覺得煮嘢食好麻煩所以細細個已經唔打算做廚師呢？Coco喺屋企人心目中係就係公主，但佢本人就絕對冇公主病，只係因為佢家人太著緊佢學業，成日叫佢讀書讀書讀書，完全唔畀佢入廚房，所以就算佢幾鍾意食都好，都冇機會親自落手試吓整返餐畀自己過口癮，直到後來Coco自己出嚟做嘢自己住，先開始接觸烹飪，仲好驚訝原來用少少錢就可以整到出面賣到好貴嘅西餐，於是就開始嘗試煮嘢食。

Coco自問對味道好敏感，對煮嘢食又有Sense，加上十幾年廚藝經驗，都算係煮得之人丫，點知承上文話齋，一個二個都當佢Lulu，咁失威，當然要爭返啖氣，仲要有老公仔支持係咁Push push push，更沒有不去藍帶的理由吧？Coco就有啲扁嘴咁講︰「呢件事好波折……我有一日同佢講……我去唔到讀書喇……我有咗呀……」唔……似乎囡囡呷醋，所以要搶先喺Coco實現藍帶夢前出閘，留住媽媽喎，叻女呀！咁識睇準時機，不過「道高一尺，魔高一丈」，囡囡一定估唔到出咗世原來都唔係大晒，爸爸竟然喺囡囡十四個月大時，送媽媽去藍帶讀書！

莫講話Mean娜丫，就連Coco自己都覺得佢老公好黐線！之不過咁……Coco就話︰「生完BB頭一年都喺屋企照顧BB，呢段時間多咗機會入廚房仲煮嘢畀好多人食，我嘅生活突然變咗日日都去街市跟住返屋企煮餸，咁我就愈煮愈開心，覺得搵返自己嘅地盤！」忽然之間有呢個開心大發現，Coco忍唔住同老公仔講佢真係好鍾意煮嘢食，睇見自己心愛嘅老婆搵到自己「真愛」，做老公嘅當然想佢可以追夢，Keep住呢道光芒，就咁聽好似真係癲癲地，話晒囡囡先一歲人仔，就要同媽媽分開？兩者都好唔捨得啫！而且為人父母，點可能咁灑脫話走就走？

女神揀得嘅男人，又點會係傻瓜呢？佢唔係真係不負責任亂吹架，雖然當時看似係一個無法抽身追夢嘅局面，但人哋原來一早就為Coco諗過度過，當時唔走，就要等到囡囡十八歲先走得甩；但如果當時走去讀書，囡囡都係一歲三個月，讀完九個月課程，佢就兩歲，襯佢咁細個咩都唔知就去讀書先，兩歲之後囡囡要返學就可以一直陪住佢，時間計到啱啱好，Coco都不得不佩服，覺得老公仔講得好有道理！

Coco決定咗就坐言起行，雖然呢個Idea有啲Crazy，但好彩親人好友都十卜佢，令佢可以安心上路朝住藍帶夢出發。之不過有世界最大廚藝學校之稱嘅「巴黎藍帶廚藝學校」真係唔惹小，Coco都坦言成個課程比想像中辛苦好多好多︰「因為佢一入去已經係以好專業、高級、類似米芝蓮餐廳嘅準則要求你做事，對於我呢個從來都冇喺餐廳做過，淨係喺屋企煮餸嘅一個女仔嚟講係好難……同埋入到去唔單只要煮餸咁簡單，仲要搬搬抬抬、洗廚房，仲要用好勁化學成份嘅清潔劑，洗到對手又乾又裂……老師又會成日Push你好快手要完成好多嘢，一切對我嚟講都好高要求，又令我好緊張……」Mean娜聽完個心都赤赤痛，第二個就話知佢丫，真‧女神喎！而家係真‧女神Coco受苦喎！人係咁偏心對靚女特別憐香惜玉架喇，吹咩？話晒Coco一直做幕前，唔使做粗重嘢，一下子要成個阿四咁又搬嘢又洗嘢，望住佢標緻嘅五官、甜爆嘅笑容、嫩滑嘅玉手、女仔見到都想J嘅長腿……唔得喇！Coco唔可以再畀人虐待呀！有咩就衝著……攝影師嚟啦！

不過要面嘅Coco就一於冇有怕，係呀，讀藍帶好辛苦呀，但面子最重要！同全世界講晒自己擺低囡囡去追求夢想，咁輕易打退堂鼓嘅話，將來點面對鄉親父老！加上老公仔全力支持Coco，又幫佢打點晒一切，畀埋學費生活費，如果唔乖乖讀書，點對得住佢呢？所以Coco決心要學晒所有嘢，用個靚靚仔仔嘅成績返嚟見人，但除此以外，原來佢心目中仲有一個小小嘅想法，促使佢咁畀心機︰「雖然嗰時我個女得一歲幾，但我都希望將來可以畀佢知道，原來媽咪嗰時為咗自己嘅夢想，都曾經做過一啲犧牲，咁我都想佢將來知道，有啲夢想係好緊要，有時為咗夢想係要有所犧牲。我唔知佢明唔明，但我希望點都做一個榜樣畀佢……」

老老竇竇，成個訪問Mean娜覺得呢段說話真係最感動，成日聽人講夢想夢想，但好多時都因為現實條件而限制自己追夢，有時可能因為經濟問題，有時可能因為家庭問題，但好多時最大問題都係因為我哋唔敢犧牲唔敢試。好多人以為追夢一定要襯後生冇負擔時做，但好似Coco咁，真係有心有熱情，就算有家室生埋BB，都可以勇敢去追求自己嘅夢想，當然，Coco好好彩，有經濟能力又有好多人支持佢，但佢亦都唔係完全冇犧牲，要放低心愛嘅囡囡遠赴倫敦尋夢，其實真係唔容易，但為咗自己，同埋建立一個好榜樣畀自己嘅孩子睇，佢可以一直忍忍忍忍忍忍忍。講到尾，有幾多家長真係可以身教自己嘅小朋友，講得出做得到呢？

最後都幫Coco宣傳下佢嘅新書《蔣怡的藍帶成長日誌》啦～裡面唔只有Coco入讀藍帶廚藝學院發生嘅故事，仲有好多一個人追夢嘅心路歷程︰離別、牽掛、寂寞、迷失等等。好多謝Coco送咗本咁有意義嘅書畀Mean娜，對於有夢想嘅人而言，呢本書的確對自己好大鼓舞，重點係咩呀？本書入面有好多Coco嘅靚相呀囉～嗱～Coco～你送畀我嘅書我真係有睇架！

特別鳴謝︰

場地︰Cooking Fever
Hair︰Louis Tse @Popeight
Make up︰Tiffany Fong @26 Production