提起KB（Kevin Boy），好多人都諗起個「癲」字，鬼咩～條友仔之前喺《玩爆你個腎》嘅時候咁喪，而家喺《晚吹─真PK》仲食埋曱甴扯Lin頭，唔話佢傻話佢癲已經畀面佢啦～之不過對KB本人而言，一切都不過是「別人笑我太瘋癲 我笑他人看不穿」，聽吓佢點為佢嘅「癲」下定義？

根據偉大嘅《漢語詞典》解釋，「癲」一詞除咗形容精神疾病之外，仲有「言談舉止輕佻、不莊重、不合常情、放蕩不羈」之意，亦即係大家眼中嘅KB。但其實，係真係咁ridiculous定因為大家唔敢試唔敢做，所以先將餘下嘅少撮人定義做「癲」？KB就帶點無奈︰「其實唔係話癲，可能係夠膽試啲新嘗試。」

的而且確，癲唔癲，其實都係相對嘅啫，你敢做人哋唔做嘅嘢，「唔癲」嘅人咪相對覺得你「癲」，喺日本又或者外國，玩得更變態核突嘅人比比皆是，但點解啲人仲係一副習以為常嘅樣子？因為佢哋成村人都係咁，多一個少一個癲佬，有幾奇？嗱嗱嗱！唔係撐大家應該啜腳趾吞老鼠呀！Mean娜自己都唔L玩得起呢啲遊戲，不過想帶出一樣嘢，香港人經常習慣將自己困在框框裡，好多時因為一個「怯」字，就輸成世。妖～整你個掣！唔係仲講緊食曱甴呀傻西瓜lol！！唔敢食曱甴係正常架，唔會輸成世架，我哋而家要跳去另一屠次，講人生講意義！生命中好多嘢都需要你「叮」一聲發癲，先會跳出框框有所改變架～學KB講︰「想做就去做，唔好有個框框去框住自己，要記住你自己係你自己，冇人可以幫你做到決定，最重要想試就試左先，因為他朝有一日，每個人都有闔蓋嗰一刻，起碼當下我揸住個蓋都覺得『起碼我做過啦』。」

就以KB自己為例，你以為佢人生最癲就係喺《晚吹》玩嘅核突嘢？nonononono，雖然相比起吞老鼠係好小兒科，但原來佢人生做過最癲嘅事係……「辭咗一份酒店工去夾band，我覺得呢樣嘢係非常之癲。」聽落好似好碎料呀可？但諗深一層，玩核突嘢，都係一個髦聞發生嘅事，陪唔陪人癲，真係好閒；但對於自己嘅人生，選擇癲定唔癲，咁就成世，你，玩唔玩得起？而KB就選擇盡地「癲」一鋪，扭轉咗佢一生，變成一個音樂人。

下？！KB係音樂人嚟架咩？佢唔係齋玩喪嘢咋咩？！噓！咪咁失禮！KB一直游走於主流同非主流音樂之間，你唔熟悉作為音樂人嘅佢，唔出奇嘅，畢竟佢癲嘅image更加鮮明出眾，但其實KB係前KingLyChee，LMF及Hardpack樂隊鼓手， 亦擔任各大小演唱會樂隊成員之一，而家仲獨立發展，推出多首歌曲例如「我是肥仔」、「我又是歌手」、「我最喜愛的香港人」等等。

未聽過以上嘅歌？咁原因有幾個，一係你根本唔留意KB，一係全世界都播晒主流音樂，冇人理呢啲非主流但又好有Meaning嘅歌。前面講到，香港人唔敢跳出框框，但Mean娜就覺得，其實香港娛樂圈直頭自己整多33層框框，留畀自己人一齊玩，其他人？喺框外食自己啦！身為一個「框外人」，KB都慨嘆今時今日嘅香港娛樂圈「變咗」︰「我覺得以前啲人比較團結，而家成個圈子少少散散哋……」不過～雖然面臨呢個境況，但KB自己都好感恩，娛樂圈仲肯容納佢呢條茂利（真。KB自己講！）佔一個corner，畀另類娛樂大眾，亦希望呢個非主流嘅自己，可以少少少少地改變公眾人物嘅形象，唔再好似所謂嘅「偽人」咁，人前人後兩個樣。「我諗我想行貼地啲嘅路線，其實大家都係平等。」Wow！估唔到粗獷嘅外表下，KB咁有人情味，唔怪得可以創作出《我最喜愛的香港人》呢首令我哋咁有共鳴嘅歌。

老老賁竇，好耐冇聽過講香港人精神嘅歌，KB首《我最喜愛的香港人》真係令有種返去「黃金八十年代」嘅感覺，對於充斥住傷春悲秋慘情歌嘅樂壇而言，有幾耐冇聽人正面地唱過讚頌過香港人精神？

「其實基下層係好辛苦，比如執紙皮啲婆婆咁，我平時喺街見到真係會幫佢哋推，但我覺得好多香港人都好似當佢哋透明，我留意咗好耐，所以之前就一直諗，如果有機會出到隻歌，就好想講返呢樣嘢。基下層其實係社會嘅馬步，就好似蛋糕嘅sponge咁，其他嘢都係放喺佢哋上面。如果冇佢哋去做維修工路、維持地方整齊，香港唔會有而家咁繁榮。所以我好想向佢哋致敬，同埋提醒年青人，如果見到佢哋有需要，不妨去幫幫手，甚至乎同佢哋講聲︰『辛苦晒！』佢哋已經好高興。」嗚嗚嗚……聽到KB咁講真係好鬼滾動……呢啲就係香港人精神！但都好多人話香港人已經變咗……你首歌講到香港人好有骨氣乜乜乜，會唔會離題要重作架？

「其實我覺得以前嘅香港人係好有人情味，好有骨氣，就好似歌詞中有句『我仲有一對手 唔使人哋幫手 唔伸手攞綜援 呢啲叫做骨氣』，香港人嘅精神就係自己有手有腳一定會去自己搵食、自力更生。嗱！真係冇歧視，但而家香港有其他地方嘅人嚟呃呃氹氹去呃人，令香港人唔似以前，當年去茶樓飲茶，三唔識七都堆埋吹水，而家就行緊少少都好有防範，搞到少咗本來嘅人情味……」呃……即係你首歌MV opening嘅撞車黨咁……明嘅明嘅。