俗語有云︰「家有一老，如有一寶」，長輩嘅人生經驗實屬無價。現年64歲，縱橫演藝界40多年嘅「達哥」吳孟達，曾獲得多屆香港電影金像獎以及台灣電影金馬獎最佳男配角提名，並以《天若有情》榮獲第十屆香港電影金像獎最佳男配角，縱然冇一部作品領銜主演，套套都擔任配角，但相對其他配角演員，達哥卻係少數靠演配角紅遍華人社會嘅傳奇演員。

達哥嘅前半生，事業大紅大紫，過早成名令佢不期然心高氣傲，終日沉淪於酒色同賭博之中，更係風流成性，擁有三個家庭。當時佢曾被杜琪峰大罵「爛泥扶唔上柄」，最後仲欠下30萬巨額賭債，一度想過自殺。後來幾經波折，終於痛改前非，重新振作，認真磨練自己演技，直到九十年代初遇上周星馳，兩人擦出火花，創造出最好笑最無厘頭嘅「黃金組合」，成為香港人心目中珍貴嘅集體回憶。

達哥嘅後半生，雖然身邊冇咗「星仔」呢位最佳拍擋，但仍然努力為三個家庭及五名子女奔波工作，遊走於中港台三地辛苦拍戲，一直唔願退休，結果喺如斯拚命嘅情況下，差啲真係連命都拚埋出去。喺2014年，年約60嘅達哥不幸患上心臟急衰竭，兩度傳出死訊，令人擔心不已，可幸現在已冇生命危險，回復精靈健康，重返影壇同大家見面，繼續演出精彩角色。

達哥嘅一生，大起大跌，現年64歲，經歷過最苦最甘，以及生死關口。如果話「家有一老，如有一寶」，咁我哋生命中有呢一位老前輩願意敞開心扉，向我哋道盡人生感悟，我哋更應珍惜呢位至寶。

吳孟達的「身」路歷程

好多人都知道達哥兩年半前生病，但好多人都唔清楚詳細情況。「其實兩年半前，我喺內地河北省拍嘢，嗰時幾凍吓，可能就係凍親，畀病毒感染。當時冇為意，以為普通感冒，於是叫經理幫手買啲感冒藥，諗住食完冇事，點知食嚟食去都好似唔係幾好，仲發覺條氣愈來愈喘，但我都仲唔知死搏命食煙，係啲朋友叫我睇醫生我先去睇。初時睇個女中醫，個中醫一按我脈搏，就叫我最好去醫院Check下，話我個心跳得好有問題。我就話︰『哦，好呀！』但『哦』完之後唔得閒，搞到工作期間呼吸困難，朋友即刻車我返香港睇心臟科，一Check就大劑喇，醫生問我而家最親嘅人喺咪香港，快啲叫佢過嚟。哇！我話︰『有冇咁嚴重呀？！』醫生就話︰『好大劑呀吳生！』」

當時醫生表示達哥個心臟跳得好唔規律，而且個心腫晒，要即刻簽紙送入「ICU」（深切治療部）。雖然達哥自覺自己行得走得，意識又清楚口齒又伶俐，食口煙都仲得，但醫生堅持病情可大可小，一定要達哥入「ICU」，24小時都要有護士跟住。護士推達哥入「ICU」時，達哥見房入面四個男士成面都插晒喉，身體好虛弱，夜晚又會聽到佢哋家屬探病時喊晒話︰「阿爸！我係邊個邊個呀，你聽唔聽到呀？」聽到達哥心都寒埋，覺得呢種氣氛好唔自在，問一問護士︰「入『ICU』咁嚴重架咩？我講嘢又咁清醒，仲好精靈……」護士就話梗係嚴重，所以醫生先要佢入嚟。後來達哥就要求醫生轉間私家房，因為唔識驚嘅佢聲稱真係頂唔順「ICU」啲氣氛。

達哥一直唔為以自己病情嚴重，仲試過去廁所時隨手擺低測心跳嘅隨身儀器，結果護士喺外面部機見到達哥冇咗心跳顯示，嚇到即刻衝入去拍門猛問達哥有冇事，話個儀器一定要24小時跟身，因為達哥心跳不穩，心臟又漲大，萬一突然受剌激令心臟停止，咁啱身邊冇人識急救，可能就咁玩完，「鄧光榮呀、許冠英就係呢種」達哥心有餘悸。

好彩最後達哥都脫離生命危險，諗返起終於識驚，明白心臟健康係幾咁緊要，決定戒煙戒酒，養返好身子。而家達哥自問已經好返七、八成，精神同氣息都好咗好多，仲提醒大家真係要做運動。

吳孟達的「心」路歷程

人哋成日話半隻腳踩入鬼門關，個人就會有新體會，達哥話其實佢喺醫院時已經係咁諗人生︰「因為喺醫院太得閒，24小時冇嘢做，自自然然就會諗到未來嘅人生會係點呢？仲有冇工作能力呢？仲需唔需要工作呢？跟住又諗之前好似冇咩時間陪屋企人，咁多年一直喺出面勞勞碌碌，係咪可以多啲時間喺屋企溫馨下呢？又諗下半世如果就咁退休，啲錢夠唔夠安置屋企生活呢？計嚟計去發現似乎可以休息下，等身體好返啲先再試下拍返戲，辛苦嘅咪唔做囉，唔使好似以前咁搏命去做。」

話就咁話，但大半世都喺演藝圈打滾嘅好戲之人吳孟達，總會心癢想挑戰自己底線，睇下自己仲可以演到咩程度。對上達哥演出《導火新聞線》裡面嘅炸彈客，需要唔少激動場面，達哥就特登想試下，試下自己身體受唔受到，「呀～又畀我OK喎！哈哈！」喂喂喂達哥！！你嗰頭先話咪咁搏，呢頭又搵自己身體嚟玩？！不如索性全面休息陪屋企人啦！

達哥笑笑口︰「你工作開呢一行呢，如果話完全退晒，三五七年就大劑喇！你要不停喺呢個社會同圈子入面有接觸，而且我有得揀架嘛！好似我而家身體回復七、八成，我都唔會畀自己太辛苦，七、八、九月就盡量避開拍嘢，古裝同長篇電視劇更加唔使傾。《導火新聞線》我都係拍咗七日咋嘛～如果你真係覺得自己病喇，要退休喇，咩都唔做喇，完全脫離喇，我相信十年八年就……『哎呀！』咁架喇，因為人就係咁奇怪，你最多可以做少啲，但唔可以完全唔做，我覺得咁先係正常心態。」係係係，最緊要你而家顧好個身體。「一定架喇！冇身體冇家人就完全冇用架喇，你而家搵錢為咩呀？為咗令屋企人舒服啲，令身邊人生活提高，最主要都係咁。下話？」

不過緊接達哥又有點感慨︰「咁多年嚟我每個角色都好用心去構想點創新、點先係最適合戲中人身分。但病咗之後，好多時可能去到最爆炸嘅位就要保守啲，或者用另一個方式去表演。當然如果你唔盡力去做，係唔好睇架，所有工作都係，包括任何一行。你唔出晒力搏晒命去做，絕對係有打折扣，觀眾亦都好快發現︰『咦？冇咁搏命喎達哥！喂你以前唔係咁架喎！每一個動作每一個表情你都好搏命喎！做咩有保留呀？』有保留係因為驚自己身體唔好，驚萬一衝撞咗身體會爆血管呢樣嗰樣，我認為咁係唔好，只能夠盡量囉……」

（完）

後記︰

訪問到呢度，望見達哥婉惜又無奈咁笑住講︰「只能夠盡量囉……」，老老竇竇，個心真係有啲酸酸地。

是次訪問，係Mean娜第一次接觸達哥，喺訪問前，就聽人講過達哥勁nice勁好人，當時反應係︰「哦～」到真正同達哥相處，雖然只有短短幾個鐘，但已經係咁聽到達哥「唔該」前「唔該」後，又係咁同大家講「辛苦晒」；又會幫Mean娜斟水夾餸，非常親切，仲不忌諱講私事。訪問完有人請佢去見見娛記，達哥就好鬼馬咁話︰「Mean娜要同我做訪問呀～哎呀好忙呀！未做完呀！」轉頭就細細聲打晒眼色同我講︰「應酬好攰架！:( 我唔想去呀，我哋坐喺度繼續傾偈食嘢好過啦～」真係好鬼可愛。

不過Mean娜一邊食嘢，一邊望住達哥，發覺佢而家真係瘦咗好多，亦都老咗好多，回想起以前達哥戲中容火煥發、頂住個大肚腩笑笑口嗌「星仔」個樣……在此真係好想同達哥講一句，過去你每個角色都出盡100分力去演，即使而家只剩下七、八十分，都唔緊要架，你依然係香港人心目中最Cutie嘅「三叔」，最重要係，你要身體健康:)

Video︰Dave@MenClub
Photo︰Vincent@MenClub