「X，真是好L型呀 ……」，訪問裡有一段恭碩良的Drum Solo，從未看過他表演的女同事們瞬間中招，原來Jun在你面前打鼓，可以型到這個地步；然後Jun在MenClub Facebook Feed裡演出的幾首歌，全是Live Performance，未經調音刪剪，但聽起來絕對會瞬間毛管戙，Jun笑說香港有很多勁過他的音樂人，但現場唱得出如此水準的歌手，我說是專業歌手，不是歌手兼鼓佬兼作曲兼監製兼演員的音樂人，在香港數得出多少個?

恭碩良，一個擁有多重身份的音樂人，唱、作、打鼓，唱片監製還有演員，如此才華橫溢的表演者，他還謙稱Jun只是一個來自澳門的村仔 : 「澳門係一條好細嘅村，我係澳門嘅村入面嘅村仔嚟之嘛。我由喺嗰度去到喺香港，可以出自己唱片，可以而家喺度同大家做訪問，其實呢個係幾意想不到嘅事嚟架。其實我好知架，我好知自己好好彩架。」

將要踏入不惑之年，Jun可以很Rock，但同時可以沉穩自如，從年輕時候出道，經歷過不少高山低谷，走過多次起落，回望往昔，原來自己的人生高低潮，離得如此相近 : 「(人生) 低潮位係最多人識嘅時候係低潮囉。即係去到邊都見到我嘅時候，嗰段時間最低潮。最高潮係無人認得我嗰陣時最高潮！我唔知點解，但呢兩個 (時期) 係相隔幾年架咋。」

「好坦白講，其實，去返我係一個澳門嘅村仔。村仔出到城，去見到咁多人，見到咁多燈，好多Attention嘅時候係唔慣嘅。之前我可以話係細個囉，你要我一個新人咁坐喺度做訪問，唔係咁易架！嗰陣時我諗缺乏經驗，同埋細個囉，我好早入行架嘛。經歷咗嗰樣嘢，高潮位係當我完全脫離咗香港樂壇囉，03 年…… 完全同香港樂壇係無任何Contact。」

當時坊間也有不少傳聞，揣測恭碩良的音樂生涯是否遭受唱片公司打壓，十多年後的今天，他仍然堅持重申，脫離香港樂壇是個人決定，很老套地說，是為了自我發現與追尋，重新梳理紊亂的人生。「呢個唔係因為公司點點點，唔係！完哂約架啦，係我自己決定返澳門再Restart過成件事。Reset個人；同埋Reboot囉。我嗰陣時好清楚，嘩完咗份約走先 ~ 不如搵吓自己先，我地唔好搵咁多嘢先，搵返自己先，你究竟鐘唔鐘意音樂架先，我係去到嗰個位。」

「我真係去到一個位，我一聽到結他聲已經噢，頂唔順！聽到人地開咪，我唔係驚個Feedback，我係對音樂，一個我咁鐘意嘅嘢，而我係可以放棄。因為嗰陣時去到唔好玩嘅程度係，唔好玩嘅。我知道我係去緊嗰個方向我就，不如Reset咗先。你最亂嘅時候，最唔清楚嘅時候，最好就係去返你最Original重新嚟過先，全部啲拖板拆哂佢先，你會開始搵呢個插蘇係邊個架? 絕對唔係我擺架囉。」

「全部剝哂，啲線全部重新再搞，其實好好玩架。咁一個人生要做好多次呢個動作之後。你就會知道，拖板嘅好處同唔好處囉」說真的，我挺喜歡拖板的比喻，不同階段的人生，需要多樣的輸入和輸出，一個電制豈能插到老? 懂得適當地調整，你的路才能走得更遠。

音樂才是Jun的老本行，電影演出雖是一種新嘗試，但他坦言自身的演技造詣還未夠班，還是唱歌，夾Band比較好；而我們在《Just A Concert》裡，就能欣賞到Jun做他最耍家的事 : 找一班勁過自己的音樂人表演，還有，用屬於恭碩良的音樂風格，帶給我們獨特的享受，「香港嘅觀眾都知道有咩係有誠意，有咩係無誠意，你會好快捉到呢個真定假架，香港係好叻呢樣嘢。」是的，Jun唱了這麼多年，誰會懷疑你的音樂呢。

TEXT : Raphael @ MenClub
PHOTO : Sam @ MenClub
VIDEO : Vincent @ MenClub、Nam @ MenClub、Dave @ MenClub
STYLING : Hazelnut @ MenClub
LOCATION : Rock Empire