{ SKIP }
文:MenClub Mean娜  圖:MenClub
POSTED ON 18 Nov 2016

動筆寫呢篇人訪前,Mean娜思量了許多,應該從咩角度切入文章,先可以吸引大家Click入嚟睇。最正路嘅做法,一係就放大受訪者嘅特點,一係就挖掘受訪者另一面。而是次受訪者喺大眾心目中嘅印象有三點︰瘦、拍三級片、搞笑。同你講佢拍三級片嘅事,實係最有Gimmick,但劈頭就咁介紹好易影響佢形象,No;講佢有幾搞笑?香港年中都出唔少笑話,你係咪仲想聽先;話你知呢個瘦仔嘅「激瘦之謎」?你連佢個名都未知,理得佢係肥定瘦啫?既然講到咁深入你都未必識佢條鐵,不如簡單啲,就介紹大家鏡頭前成日見嘅「瘦仔」,即係郭漢柱,其實係咩人。





我真名叫郭漢柱

「我係Andrew,大家都叫我瘦仔,其實我真名叫郭漢柱。」Andrew由於外型辨識度高,又係幕前常客,所以唔少人都會認得佢,但幾乎Yo親佢嘅人,都唔知佢叫咩名。「佢哋通常好得意架,會望吓望吓先嘅,有啲人會好明顯來回行幾個圈嚟望我,跟住就會話︰『啊!你係咪……邊套邊套戲架?你係咪拍戲架?』」猶記得當年Mean娜喺山頂蠟像館同Andrew做同事,已常常見到有香港人甚至遊客問佢︰「你係咪拍過戲?」、「可唔可以同你合照?」等等,但一直都冇聽過有人叫得出佢個名。直至現在,有時Mean娜喺Page上放與Andrew嘅合照或Live,大家都仲未叫得出佢個名,依然係「瘦仔」、「瘦仔」咁叫佢。







「銀幕食家」

女性我就唔清楚,但大部分男性認得Andrew都係因為睇過佢演嘅幾套三級片,係,係啲女堅會露點嘅三級片,所以朋友間都笑稱Andrew係「銀幕食家」,試盡不同囡囡。鏡頭前成班嗨嗨當然睇得過癮,賤賤格格咁問到「銀幕食家」拍三級片其實係咩玩法?佢似乎就唔多Enjoy︰「我同春夏拍《踏血尋梅》嗰幕大家都著條有咁少得咁少布嘅白色褲仔,然後我要浸落個浴缸入面,因為係白色褲,所以一浸落去就睇到晒現晒形……(老尷樣)。跟住《33D》(《蜜桃成熟時33D》)要影到後面全裸,咁佢就好土炮嘅,就咁搵個口罩擺前面,然後用膠紙貼四邊,咁嗰時夏天係咁流汗,塊嘢就係咁甩……(老尷樣Again),同埋搣嘅時候會好痛,如果多毛嘅人摵嘅話會仲痛,好彩我唔係好多毛。」至於拍三級片時大家最想知會唔會有生理反應,Andrew都係嗰句「心理調節好重要」︰「一方面你又要入戲,一方面你又唔可以太入戲,同埋周圍好多人望住,其實你唔會好有感覺,啲嘢多數都係演出嚟。」所以大家唔好再FF拍三級片究竟有幾爽。







一切由Drama開始

原以為Andrew嘅「出道」,係由於外型獨特而被發掘,但原來一切來得極平凡自然——就係由玩Drama開始︰「我以前讀書時做話劇嘅,畢業後就做啲Commercial啲嘅話劇,之後慢慢發展就有人搵我拍啲Youtube片呀、廣告呀,跟住就開始拍電影喇。」但當初明知道《蜜桃成熟時33D》係三級片,點解仲咁夠薑以佢作為自己嘅電影處男作?「一來其實我唔會點揀角色,只要個角色有趣有挑戰性,我就會去做。二來我就咁睇劇本,我唔知道係三級得咁緊要,佢個劇本淨係一句說話『然後他們就親熱了』,點知原來嗰一句係做咁多嘢,所以當時有少少誤會咗,哈哈……」







身體機能正常

Actually,雖然Andrew嘅出鏡率話多唔多話少唔少,但其實唔少配角演員都係差唔多出場機會,偏偏觀眾都認唔到其他人,淨係對「瘦仔」Andrew印象特別深刻,而好明顯,大家都覺得Andrew瘦得離譜,所以先咁記得佢。想當初Andrew喺蠟像館第一日返工,大家都誤以為佢係咪患上咩病所以咁瘦,加上Andrew聲線特別,樣貌唔算陽剛,唔少同事淨係估佢係病到得棚骨嘅男仔定女仔,都估咗好幾日,而佢亦笑稱︰「最多人問我嘅問題就係︰『你係男定女?』」雖則Andrew真係好瘦好瘦,但其實佢冇患上大家估嘅奇難雜症︰「我做過一啲正常嘅Body Check,唔係一啲好專科嘅Body Check,醫生話我身體機能都正常,不過就冇驗過啲染色體、內分泌嘅嘢,腦部嘅嘢就冇驗過,除咗個腦(未驗)呢,其他所有嘢都好正常嘅。」Andrew補充︰「我細個冇咁瘦,啲人最多話︰『呢個小朋友奀奀哋喎!』而唔會話︰『哇!你瘦得太離譜喇!』直到中一、二,就開始愈來愈瘦愈來愈瘦,就一直到而家喇。」雖然未知咩原因令Andrew變得咁瘦,但只要身體健康,已經足夠。


後記︰我不過是個人

香港男男女女成日話要瘦要瘦,但瘦到極致就會惹來歧視,Andrew都受過他人不少奇異目光︰「對我唔熟悉嘅人會(歧視)囉,但如果識落,真係同我識得耐,就會覺得我個人又幾好傾,冇乜嘢咁樣,就會OK。同埋喺螢幕前面或者Youtube上面,睇得多我嘅人呢,慢慢都會覺得OK,只不過都係一個人啫,高矮肥瘦大家都會有唔同。」係囉,只係Andrew比我哋瘦啲再瘦啲,但咪又係人一個,各有不同,世界先會變得有趣。(親愛的Andrew,同你做Friend,係開心嘅!:D)


Venue︰M Boxing Fitness
Video︰Dave、Jo@MenClub
Photo︰Sam@MenClub


不論你對ViuTV持有甚麼態度,你都不能否認它近年為香港娛樂圈捧出一群至少有話題性的年輕面孔。單論《全民造星》系列就為大家「貢獻」出Mirror、Error、P1X3L、Collar四隊組合,再加MC張天賦、Mansonvibes 張進翹、A ...
people
【MenClub People】鍾意,己經夠啦 - Johnny Hui 強尼
30 Sep 2022
第一次親眼「見到」洪嘉豪,是去年年尾在Jace (陳凱詠) 的演唱會上。雖然當晚他只是作為觀眾於台下睇Show,但每到Jace準備邀請嘉賓上台時,我旁邊就會有個不知名男觀眾,不停用洪嘉豪欠他錢沒還似的語氣大叫「洪嘉豪 ...
people
【MenClub People】一步一腳印 - Kaho Hung 洪嘉豪
04 Jul 2022