「愛拚才會嬴」呢種熱血精神聽落好Old School，但喺呢個時移世易嘅時代，男神女神交替得仲快過電影，如果空有Attractive嘅軀殼而冇內在，轉個頭就會畀人拋諸腦後，忘記得一乾二淨，想上位？真係要回返句「好心你幾廿歲唔好咁多幻想啦」.jpg。

而朱鑑然之所以能夠喺成為近年較突出嘅新人，唔單只因為佢擁有俊俏嘅外貌同睇到人濕晒嘅Body……（Er，我指睇到人流晒口水），再加上前香港游泳代表隊成員嘅光環，的確令人另眼相看，話晒可以游水游到代表香港，真係唔講得笑！不過香港地，高大威猛靚仔有才華嘅男小生並唔算少，但佢哋欠缺嘅，可能就係一份「愛拚精神」，一份好似朱鑑然咁堅毅不屈、努力向上嘅精神。

可能因為由14歲開始就加入港隊，Keep住成日訓練同操水嘅關係，朱鑑然毅力過人，遇到錯折都唔會輕易言敗，仲會追求超越自己。咪睇朱鑑然平時喺節目上咁玩得咁陽光，其實佢內心實質係一名怕羞仔，不過你懂的，要喺呢行打滾，摺埋摺埋點得架！「其實我係怕羞底嘅，但成長嘅過程會令我學識到唔同時候要有唔同禮儀、面對唔同人要有唔同態度，然後慢慢學識將怕羞嘅一面收埋得好少少。因為你開工拍嘢冇得你怕羞，目前我嘅經驗話我知，最重要清楚件事做咩、你嘅角色係點要、要點去演繹會好啲……我學識咗其實任何人都可以問佢問題，比如導演、其他演員，都可以多啲溝通同商討，咁對件事會再好啲。」

試問呢種傻更更得嚟又上進嘅靚仔，邊有人受得了~ 除咗女仔封朱鑑然做新一代男神之外，就連男仔都buy佢！That's why朱鑑然以新人嚟講，都得到唔少演出機會，最近就有份參與電影《骨妹》，飾演一位愛上骨妹嘅「傻仔」，佢就話︰「我個人呢，除咗放之外其實仲係戇居居，只不過我放嘅時候你見唔到我戇居居（笑）。我覺得演戲時人係有好多面，咁我都只不過係將我其中一面代入角色，然後呈現喺畫面上畀大家睇。」

平時見朱鑑然拍劇多，拍電影感覺又如何呢？「電影就慢啲細緻啲，劇集就會快啲，不過我之前拍嘅劇集都近乎電影嘅Quality，所以都未至於話好『Chur』。」原以前拍電影感覺上會緊張啲，但朱鑑然又唔係咁睇︰「拍電影準備時間會多啲，電視劇有時可能臨時會改，當日先畀嗰場戲或者台詞上嘅改變。我個人著重於需要多啲時間去準備事情，所以如果事前功夫足夠，我會更加放鬆地去做。」

老老竇竇，朱鑑然多人賞識，唔只靠樣，因為佢係一個會畀Effort去增進實力嘅新人︰「我知道如果我唔去努力，我就一定唔會成功，雖然你努力咗都未必會有回報，但係如果你唔係抱住要全心全意仗大好件事嘅心態，就一定冇機會畀你，機會係要自己去把握，有個機會擺喺你面前嘅時候，如果你唔識去珍惜，咁你就會錯失咗。」

問到佢以前有冇咩特別經歷，佢就話︰「我試過以前Cast過一個飲品廣告，我Cast完之後返到屋企，覺得Casting時反應唔夠好，於是自己Contact返對方，話覺得自己今日個反應可以再做好啲，我返到去好認真咁再諗過一次，可唔可以畀多次機會我。」之後對方就話OK，因為佢好欣賞朱鑑然認真嘅態度，最後Casting多一次，朱鑑然就成功得到角色。「其實我嗰時有猶豫過覺得對方未必會畀機會我，但係當你覺得件事係可以做好啲，咁就應該去爭取。」

當然，有出色嘅新人，都要有人願意畀機會。成日都聽人講香港新一代幾唔掂，但如果冇人願意教願意培訓，試問新人又如何成長呢？努力嘅人唔係冇，可能佢哋欠缺嘅只係大家給予嘅機會。

Venue︰觀塘如心艾朗酒店