當初《一念無明》嘅構思，就係由新聞報導上一篇小故事而生︰「有次編劇睇到篇新聞，講個中年男人長期照顧一個有病患嘅爸爸，你可以想像到咁嘅關係其實係好折磨雙方。有日中年男人照顧爸爸時有啲拉扯，結果爸爸死咗，個仔被判誤殺。但個新聞就咁一件事件就完咗，冇人知道或者冇人關心個仔同爸爸點解會走到呢步，亦冇人理往後個中年男人仲要面對咩情況。於是編劇覺得好糾結，認為我哋關心一個人唔係限於一件事，而係要同對方一齊經歷，你先會知道呢個人真正嘅故事係點。或者可以講，比如呢件悲劇，我哋應該要從中睇到乜嘢、學到乜嘢呢？就係因為呢種糾結，編劇開始創作去回應呢個事件。」後來黃進同編劇一齊進行許多訪談、資料搜集，甚至相約醫生、社工、精神病患者傾偈，了解香港社會好多真實故事，而《一念無明》電影中好多對白，都係真實出現於別人嘅故事當中︰「拍《一念無明》嘅中間我一直好強烈覺得呢個唔係Drama咁簡單，而係背負住好多人真實嘅生活同故事。」

就好似《一念無明》其中一場戲，阿東（余文樂飾）同黃大海（曾志偉飾）喺天台鬧交，黃大海話︰「好多事都係因為我先搞成咁，但我真係唔識，我真係唔識做人老竇，冇人教過我做一個爸爸應該要點做。」呢一句對白，除咗觸動黃進之外，仲觸動到好多男觀眾︰「好多人差唔多年紀就被安放去某個位置︰要成家立室、做好爸爸、做好丈夫，但其實冇人教過佢應該要點做，每個人都好似強行被拉上馬，忽然間就要做爸爸，為孩子去負責。」黃大海句「我真係唔識」可能係好多男士嘅心聲︰都冇人教過我要點撐起頭家或者做人爸爸，但就好似冇得迴避，一定要做。