新春金多寶剛於上周末攪珠完畢，如果你係幸運兒，真係恭喜晒你呀！中左咁大筆彩金，真係一時間會六神無主，開心到唔知點做好。唔好以為發左達可以亂使錢呀，古今中外好多中獎者因為無計劃亂咁使，最終落得潦倒下場。

撥備做善事

中頭獎咁好運的事，相信已經用盡了畢生的運氣，甚至乎是透支了往後人生的好運，為了讓餘下人生不至於走霉運，又或者為求心安理得，又或者想將好運分給有需要的人，中了橫彩做善事是常識吧。至於做多少善事，就沒有明確規定，世界上慘人何其多，講真真係幫唔晒，但幫得幾多就得幾多啦。

買大份保險

突然有一大筆錢，使錢購物是正常不過的事，但購物之前，謹記先為自己買份保障先。人壽、危疾、意外、醫療，之前可能因為收入僅僅夠過生活，未必做到充足保障，而家有充裕金錢，為自己、家人、愛侶的未來生活著想，要做好長遠打算。

整張平安紙

如果已婚、有家庭的話，更應該趁機會做定張遺囑，做好財產分配，以免將來家人為了爭產失感情。既然有好運中頭獎，天知道日後會否行衰運，難得有能力做好準備，梗係做左先啦。

做理財投資

金錢無人會嫌多，況且坐食會山崩，使錢前梗係要先建立穩定現金流，將錢用來搵錢，令到財富繼續滾滾來，永遠做個有錢人。錢搵錢的難處，在於資金不足，難搵大錢，但發左達有龐大資金，追求穩定回報，買高息股收股息、買樓收柤等簡簡單單的投資取向，已經好夠用。

花錢前諗諗

發了達都要保持發達前的簡樸生活，咁發達來為咩？所以，發達後當然要豪佢一豪，食好住好玩好，絕對唔算亂花錢。不過，雞蛋仔其實都好好味，食好唔代表要餐餐花一萬幾千食蠔食和牛，在平常的生活中豪使一下作為生活調劑，已經很足夠。