隨住Windows 11正式版即將推出，近日科技網站Windows Report調查咗177國家/地區、總共11,097名用戶，結果顯示高達54%受訪者表示急不及待升級Windows 11，不過都有19%受訪者表示唔想升級，唔知各位想「睇定啲」嘅朋友，見到呢個結果意唔意外呢？

Windows Report首先問各位受訪者對Windows 11有咩睇法，結果顯示高達53%受訪者覺得Windows 11睇落非常Amazing，急不及待要升級；15%人就認為Window 11同Windows 10睇落非常相似；7%人希望新系統會有更大變化；5%人認為新系統設計靈感嚟macOS，最後就有19%人表示唔鍾意並且唔會升級。

可能大家都會好奇點解咁多人會打算升級，或者可以喺另一項有關「最喜愛Windwos 11新功能」嘅調查會搵到答案。數據顯示有超過3分1人（35%）都表示最鍾意就係Windows 11嘅置中式選單設計，另外有26%人盲最鍾意就係新系統能夠原生支援Android應用程式，方便喺Android同Windows設備之間無縫切換。

最後補充一下今次調查嘅受訪者資料，其中有89%人用緊Windows 10、6%人用緊Windows 7、用macOS/Chrome OS/Linux嘅受訪者各佔1%，剩底個2%人就係用緊其他作業系統。雖然調查涵蓋咗177個國家，但主要都係歐美地區及印度用戶，唔知大家對於以上結果有咩睇法呢？或者歐美用家唔介意做先頭部隊幫手Debug？