去年我哋就同大家報導過，冰島試行4天半工作後，發現人工不變前題下，員工返4日半唔單止會提升生產力，亦會增加工作滿足感及參與度。而近日英國亦宣佈，會於今年6月試行4天工作，睇下係咪真係有用！

英國嘅四天工作制由劍橋大學、牛津大學、美國波士頓學院、非牟利組織4 Day Week Global、英國智庫Autonomy及英國4 Day Week行動主辦，預計於今年6月前搵到30間英國本地公司參與，進行為期半年嘅試行，當中包括Canon於英國嘅醫療儀器生產部門。

而所謂嘅四天工作制，其實係「100:80:100模式」，即係100%人工、80%工時、100%生產力，簡單黎講即係於人工及生產力都不變嘅情況下，將工時減少至4日。研究團隊將會收集各公司嘅數據，睇下四天工作制對公司生產力、員工身心健康、性別平等有咩影響，亦會提供專家協助企業實行四天工作制。

4 Days Week Global嘅項目主管Joe O'Connor指，越黎越多企業轉向「生產力為本」嘅策略，喺維持人工及生產力嘅前題下嘗試減少工時。「四天工作制挑戰目前嘅工作模式，令企業不再以辦公時間長短，而係以實際產出量度員工嘅工作」。

除咗英國之外，4 Days Week Global亦會於今年內，喺另一個國家推行試驗計劃，去年九月亦有報導指蘇格蘭會實行類似計劃。睇黎4天工作制可能會係未來大勢所趨。至於香港幾時會有類似嘅計劃啦喎……希望我有命等到啦。

資料來源：Ladbible