美國康乃狄克州Hamden鎮嘅聖心高中女子籃球隊，本月初於地區聯賽中，主場大勝Lyman Hall高中88分，但佢哋嘅教練唔單止冇被人讚教導有方，仲被校方罰停賽一場，就連校長都要出黎道歉。原因？贏得太盡喎！

Jason Kirck

圖片：Hearst Connecticut Media

件事就咁嘅，由教練Jason Kirck帶領，佢兩個女都喺隊中嘅聖心高中女子籃球隊，於本月初主場對上Lyman Hall高中，第一節就已經領先29-0，半場完領先56-0，到第三節比分已經去到80-0，完場時大勝92-4。據Lyman Hall高中女子籃球教練Tom Lipka指，聖心高中大打全場壓逼人盯人防守，偷到波就打快攻，有機會就射三分，由頭到尾都冇手下留情。

但大勝過後，聖心高中就決定將教練Jason Kirck停賽一場，並以校長Shelia O'Neill修女名義發出道歉聲明：「聖心高中重視體育比賽帶來嘅意義，包括道德、負責任的行為、領導能力以及對對手的尊重。而昨晚與Lyman Hall高中嘅比賽並不符合我哋嘅理念及哲學」。而教練Jason Kirck、Lyman Hall高中方面亦冇進一步回應事件。

消息傳出後，網上就對聖心高中嘅做法頗為不滿，並指「呢啲就係參與獎文化 (Participation Award) 所帶來嘅壞處」。所謂參與獎就係避免小朋友於比賽中「落敗」而設嘅獎項，簡單黎講就即係有份比賽就有個獎，傳遞「結果不重要，參與就好叻」嘅訊息。Kobe Bryant於2018年接受Jimmy Kimmel訪問時，曾經被問到對於參與獎嘅睇法，而佢嘅回答係「我至憎！係我見過最荒謬嘅嘢」。

資料來源：New York Times