疫情影響經濟，唔少公司都遭到重創而需要削減成本，而裁減人手就係當中不可避免嘅一環。不過近日Facebook、IG母公司Meta嘅一個炒人決定，就引起網民討論及警剔，原因唔係佢哋少咗啲咩人、又炒咗幾多人，而係因為據報呢個裁員名單係用演算法「隨機」決定，換言之，未來嘅職場可以會步入被演算法規管嘅年代。

據外媒報導，Meta早年與世界上最大嘅管理諮詢公司「Accenture」簽咗份價值5億美金嘅合同，將內容審核等工作外判予Accenture，而Accenture就於美國Austin嘅辦公室中聘請咗約500名合約員工負責呢項工作。不過於8月中，有60名合約員工就於一個視像會議中收到裁員通知，而且於9月2日就會解約，並只會補多一個月人工。更重要係，Accenture及Facebook都冇解釋過是次炒人嘅準則，當被裁員工主動詢問時，得到嘅答案就係「用演算法『隨機』定出黎嘅。」

點樣又「演算法」又「隨機」呢？據報早於數月前，Meta嘅合約員工就發現油費補貼、餐費補貼等福利開始縮水，同時公司亦引入嚴格嘅管理系統。如果員工部電腦有8分鐘以上冇郁過，系統就會開始自動扣減每日30分鐘嘅飯鐘以及30分鐘休息時間，而如果休息時間超出每日一個鐘，又或者遲過早上8點半先開始工作，系統就會自動向員工發出警告，並將其列入績效改善計劃。簡單黎講，就係有個演算法去評定每個員工嘅工作成績。

用管理系統評價員工表現其實並非新鮮事，不過以往多見於物流、工廠等「藍領」工種；而Meta今次炒人，就可能係首次有大型企業用演算法評價文職員工。或者未來會成為職場常態。

圖片：Unsplash