目前世界第三嘅「火箭」奧蘇利雲於英錦賽第四輪出局，錯失於該項賽事取得三連霸，令唔少球迷感到失望。不過好快佢就去左參加蘇格蘭公開賽，但唔知係咪因為失落英錦賽嘅關係，佢喺首圈嘅賽事竟然贏得好驚險，並且狀態反覆。

首圈賽事，「火箭」嘅對手係世界排名93嘅戴爾，理論上雙方實力係有一定嘅差距，但比賽卻一直係戴爾領先。而喺比賽第四局埋局嘅時候，「火箭」更出現致命失誤，當佢成功打入台上面隻粉紅波，分數上反超戴爾，同時完美較準台上最後一粒黑柴，呢位天才竟然大力篤Q，唔單止打唔入隻黑波，粒白波竟然飛出台，最終就咁送左呢局比對手，而自己則落後1:3。

不過唔知係咪覺得放夠水啦，「火箭」第5局終於搵番應有狀態，輕鬆以90:0扳回一局，然後再閃電式以80:1扳成局數3:3平手。最後一局，「火箭」再次把握機會打出一桿83度，成功贏埋反勝對手4:3。

只可以講，「火箭」贏嘅係理所當然，輸就基本上都係輸自己，睇下佢自己當日心情如何，唔知作為對手會唔會好似感覺完全被玩弄於股掌之間呢？