一個神秘男子，高大威猛靚仔，卻偏偏唔愛後生女，戀上比自己年長30歲的中年失婚婦人。唔止咁，佢講明自己偶像就是呢位中年失婚婦人的28歲兒子，亦即係巴西球星尼馬，換言之如今有機會做埋偶像的「後父」，愈講愈離奇，背後原來隱藏一個「驚世大陰謀」。

劇情魔幻又騎呢，讀者請做好心理準備。話說巴西球星尼馬阿媽Nadine，4年前同尼馬親生老豆結束25年婚姻後，終在近日重拾第二春，在52歲之年戀上只有22歲的高大帥Tiago Ramos，譜出轟動巴西的忘年戀。年齡差距都事少，弊在Ramos的身世被揭發之後，傳聞滿天飛，而且已經由體育版走到娛樂版。

首先，多方資料證實，周身肌肉的Ramos原來是雙性戀者，踢過巴丙聯賽，目前是模特兒兼電競選手。其次，此男子的感情世界非常混亂，前隊友講過「佢同個40幾歲的女人拍過拖」，之後又被教練投訴「因為私人問題而影響狀態，上年11月話走就走」，去過西班牙和法國延續足球事業，但暫未成功。

「2018年，我們一起同居，展開了一段三角戀。」24歲按摩師Hans Madrid大爆，此男子與他和32歲人夫Raphael Stemberg糾纏不清。然後，再有巴西男公關Irinaldo Oliver聲稱自己與Ramos共墮愛河，令人滿腦子黑人問號。戲肉來了，此男子先同網紅Carlinhos Maia打得火熱，再同私人廚師Mauro相戀，兩人是同通點是──身在尼馬的核心內圍。

因為同Mauro相戀，Ramos獲邀出席尼馬的生日派對，首次與偶像見面，見面後不久，便繼續扯旗而上，攻其不備，俘虜阿媽的寂寞的心。巴西記者分析認為，此男子同Nadine拍拖，無非是要埋偶像身，真正目的是尼馬，唔係佢阿媽。如果講法屬實，諗真都幾得人驚，部署咁複雜難明的戰術，心計甚深，同狂迷痴漢沒有兩樣。

究竟夢中人定夢中情人？時至今日，但願伯母唔會同我哋一樣想問：「而我不知道他是誰？」不如你快啲現真身，唔好要人估估吓啦！