足球界今年大執位，美斯轉投巴黎聖日耳門，C朗拿度重返曼聯，令唔少人都覺得足球界又有一番新景象。不過對於失去巨星嘅球隊，可能就需要經歷一段陣痛，其中就包括意甲班霸祖雲達斯。

今季祖雲達斯失去C朗，戰績即時大倒退，5戰僅錄得1勝2和2負，排名聯賽第13位，令唔少人都對其退步大感驚訝。而咁岩祖雲達斯近日又黎到香港舉行獎盃展覽，唔知親自黎到香港嘅總經理Federico Palomba又有睇法呢? 今次嘅展覽又有咩特別呢?

對於今次活動，祖雲達斯總經理Federico Palomba特別想言明，其實祖雲達斯與其他足球隊之間的主要區別，第一是在於其品牌已經不只是足球隊。大約 10年前，球隊已經開始將祖雲達斯從一家足球隊發展為「體育娛樂公司」嘅過程。而今次時代廣場祖雲達斯體驗館嘅參觀者就可以睇到佢地係如何改造其標誌。除左標誌之外，球會亦啟動一個營銷流程，令佢地更接近體育以外嘅世界，例如設計、音樂、時尚、藝術等等。

球會亦大力投資建設自己嘅主場都靈安聯大球場、J博物館及J酒店等。另外值得一提嘅係，祖雲達斯在體育行業中亦率先發起另一項舉措：J Medical，這是一家私人醫療中心，當中亦提供運動醫學服務及 60 多種不同嘅醫學專科。

以上呢一切佢地都歸功於祖雲達斯嘅另一個特點，就係擁有整個體育產業歷史上最長嘅所有權。擁有同一個家族作為呢100年嘅參照，在歷史上令球會帶來極大穩定性及可能性。

而談到祖記主場 – 都靈安聯大球場，總經理就表示球場今年已經10歲，而就喺呢10年入面球隊已經贏得19個冠軍獎杯，其中包括9次意甲冠軍，呢個亦說明主球場嘅重要性。

如果從商業角度睇，主場館係球隊嘅主要收入來源之一，而祖雲達斯就除左門票銷售之外，當中嘅J博物館、體育場之旅及其他活動亦起到關鍵作用，而這亦代表了主球場係祖記球迷嘅家。

而對於今次點解黎到香港展覽獎杯呢? 總經理咁樣講：

「祖雲達斯之前喺亞洲舉行過好多Fans活動，以接近呢一區多達1.85億嘅Fans群。我地創造左一種引人入勝嘅沉浸式體驗，以優質方式喺我地嘅粉絲及合作夥伴眼中鞏固左我地嘅品牌。 香港並唔係我地策劃本次活動時考慮嘅唯一城市，但由於不同地區嘅防疫措施狀況，香港就成為左今次活動舉辦嘅城市。我地期待未來再為中國及亞洲嘅其他城市帶來更多類似嘅活動及獨特嘅體驗。」

而疫情之下，對祖雲達斯又有咩影響呢？
「Covid-19最嚴重嘅影響係令比賽變得無球迷，無球迷嘅足球係完全唔同的，咁嘅情況係非常令人悲傷的。幸運嘅係，情況而家正在改善中，目前意大利體育場嘅容量已經可以達到 50%。」

對於C朗離隊咁大件事，總經理就覺得係一件平常事：
「在擁有C朗嘅3年時間係激動人心的，而宜家已經成為祖雲達斯歷史嘅一部分。 自1897年以來，足球史上好多最偉大嘅球員都曾為祖雲達斯效力，好似柏天尼、施丹、伊巴謙莫域、迪比亞路等，而且佢地中間好多位甚至贏得過金球獎，所以球會有偉大嘅冠軍級球員來來去去其實都係好正常的。」

話就話球員離隊係一件常見嘅事，但對於祖記黎講始終都係重大打擊，睇球隊現況就知幾咁惡劣。不過再低嘅低谷都經歷過，相信祖記好快又可以重回爭冠行列。