位於銅鑼灣渣甸街與繁囂大街有丁點距離，就有一間行京都酒館風日本餐廳「輝HIKA」；京都人每日不用相約就去同一家酒館，因為簡單、因為地道、也因為京都日常。

於日本東京學藝八載、回港先後出任多間著名日本料理大廚、以及在「權八」掌廚八年，「輝HIKA 」主廚輝師傅深得京都風之奧義，不崇尚花巧、真正的食味、純淨的口感。

走入輝HIKA，你可以自己選擇美食，亦可由廚師發辦，當然後者就由師傅揀選當天最好的美食。而今次先來一道「香葱鮟鱇魚肝」，其味道柔滑細嫩，有「海中肥鵝肝」美譽，配搭幾口預先安排嘅清酒「宮寒梅至粋」，清香甘口最佳搭配魚肝之豐美。

位於宮城縣嘅酒蔵寒梅酒造「宮寒梅至粋」，使用自社培植嘅酒米並精米步合至35%以下，鮮明嘅米香，被選為頭等客艙嘅機內酒、亦曾於世界最大規模Sake Competition獲得金奬。

開胃之後，主廚輝師傅帶來秋日精心料理「海膽黑魚籽伴溏心玉子」，中國係目前世界最大魚子醬出口國，黑魚籽質素極佳，附以北海道海膽，濃鮮絕妙配搭，廚師教落先品嘗黑魚子，再品嘗黑魚子加海膽，最後係海膽加日本溏心玉子，三重口味，完全美味得難以形容。

再來就係「清蒸松葉蟹」，紅卜卜嘅蟹殼，加上厚厚嘅蟹膏，一打開蟹蚶蟹腳全部都係蟹肉，味道鮮甜非常，完全令人置身於日本一樣。

松葉蟹配飲十分新鮮嘅「天美純米吟釀」，講起來先知道係由一名女杜氏藤岡美樹掌管，特別選用葡萄酒杯品嘗，尤如白葡萄嘅柔和甘酸，卻帶點柑橘般清新，入口清涼，與甜鮮嘅蟹肉可謂配合無間。

令人驚喜嘅係師傅手本名品「炙烤A5和牛」，每一片A5和牛都微烤成脆皮焦香，裡邊卻仍然係降霜牛肉，輕烤之下裡邊嘅油脂被迫出令牛肉更亮澤，加上微酸「天美純米吟釀」，真係無得頂。

之後一道需要預訂先食嘅「鮮炙吞拿魚鮫」，據說要上百斤嘅大吞拿魚先有咁大個鮫，只能夠以嫩滑去形容，完全係前所未有嘅層次。

餐廳叫作「輝Hika」，其日文意思原是光之國度，朝華夕拾，將日本此「日出之國」嘅光華帶到香港，將日本名產物帶到香港，以巧手料理時令佳餚，令我地盡收旭日光輝美味。

最後出場嘅分別係「HIKA 丼」(火炙A5和牛、呑拿魚腩、海膽、三文魚籽、松葉蟹肉)，以及傳奇級別嘅「天草雞鍋」，後者以西京味噌湯做鍋底，天草雞係失傳多年嘅雞種，在2000年才重新以土雞及鬥雞再次培養出來，如紅肉嘅雞肉一灼八成熟，食落去鮮嫩彈牙爽口，完全唔似你所認知嘅雞肉。

而今次配合嘅係一支「黑龍龍大吟釀」，單單欣賞酒標係用上搾酒嘅酒袋塗上柿嘅汁液來當天然防腐劑，再印上金箔文字「龍」，氣派不凡。一嘗就有自家培養酵母釀出嘅纖巧香氣，細酌果香多變，配合天草雞鍋簡直各擅勝場。

最後甜品當然走唔甩，能夠喺鬧市之中慢慢品嚐到如斯美味，實在有一份感動，最緊要餐廳性格比十足！

「輝HIKA」

地址：銅鑼灣渣甸街66號亨環3樓（鐵銅鑼灣站 F1 出口, 步行約3分鐘）