歐洲國家盃踢得如火如荼，日前英格蘭同德國就喺溫布萊球場上演咗一場精彩場事，事隔55年「三獅軍團」以2：0擊敗宿敵德國躋身8強。除咗場上比賽精彩，觀眾席亦星光熠熠，除咗有威廉王子夫婦攜同7歲喬治小王子、英國歌星Ed Sheeran捧場，就連「萬人迷」碧咸都帶埋二仔羅密歐（Romeo Beckham）入場觀戰，兩人型格西裝造型隨即引起網友關注。

承傳咗碧咸優良基因嘅羅密歐，無論係著衫風格定係興趣，都非常有老豆嘅影子。從細就受到碧咸薰陶下培養出足球興趣，2016更加入阿仙奴青年隊受訓，依家仲會每日同碧咸創立嘅Inter Miami CF訓練，立志成為同老豆齊名嘅足球巨星。與此同時，剛滿18歲嘅佢前排又多咗個身份，成為Saint Laurent秋冬系列廣告代言人。

在 Instagram 查看這則帖子

Revista Imagen Miami（@imagenmiami）分享的帖子

喺英德大戰嗰日，現年46歲嘅碧咸身穿碳灰色西裝，搭配淡藍色恤衫及紅色斜紋領帶，沉穩得體得嚟又不失活力。反觀阿仔羅密歐，就著上窄身黑色外套配上清爽白色恤衫及黑色領帶，加埋佢個金色平頭裝同十字架耳環，正式得嚟又唔會太過死板，整體觀感就好有當年碧咸嘅影子，唔知大家又傾向鍾意邊一套多啲呢？

（圖片截自：stepinsidedesign）

當年碧咸都留過金色平頭裝，又鐘意用十字架飾物，究竟係無意間嘅遺傳，定係阿仔有心向老豆「致敬」呢！