「何解我已經好落力為肌膚進行保養工作，每樣護膚品都用齊晒，但質素依然keep住差嘅？」

小編都留意到部份男士有以上問題出現，明明已經好勤力清潔兼搽晒每日所需嘅護膚品，分分鐘仲姿整過女生，但就係唔明邊part做錯咗，塊面好似仲衰過之前。照咁睇，事出未必無因，一定係有啲嘢做漏咗，小編就試吓列舉3個普遍男生會犯錯嘅護膚程序，如果你check到同自己情況吻合嘅，咁就唔該你快啲更正啦！

1.未清潔便搽防曬

唔好諗住搽防曬就咁直接搽上面就得，事前必須要進行簡單清潔，就算唔用清潔用品洗面，都要用紙巾印走面上油脂及汗水，盡量令皮膚乾爽及清除表面污垢後，先好搽上防曬，如果唔係就會令毛孔阻塞，令皮膚無法呼吸下，暗瘡、黑頭、粉刺通通浮面。

2.過份用力搽眼霜

點解覺得眼部周圍嘅皮膚好似鬆鬆地咁嘅？如果你有咁嘅懷疑產生，就要留意番搽眼霜嘅時候係唔係過份用力，有拉扯該部份肌膚之嫌，始終眼部肌膚係最幼嫩最脆弱嘅部份，若果過份用力，只會令該處肌膚愈易鬆同有皺紋，到時搽乜都補唔番。

3.忘記深層清潔

你每日都有跟足程序搽護膚品，但就覺得啲養份好似無入到肌膚底層，感覺好乾、又易出油，其實你就係忘記咗重要一步。記得要定時進行磨砂及敷上深層清潔面膜，始終要清潔內裡污垢，毛孔先可以盡情吸收養份。