你睇佢外表以為走文藝書生路線，實情係走開搞笑派別嘅波鞋評論員兼blogger Brad Hall，終於係網上發布咗佢第一條「實戰」片段，而測試對象係Nike Kobe 10 Elite又名「Grand Purple」。Brad Hall今次嘅測試非常之咁認真，親身著住對Nike Kobe 10 Elite體驗佢嘅性能有幾正，睇佢係得個外表定有埋內涵，仲隆重其事地搵「人」返嚟陪佢打one-on-one。

其實有睇開Brad Hall都知道，不嬲佢都係sell古怪言行嚟評論波鞋，你睇佢一開始除褲準備打波，肯定以為入面係條波褲啦，點知係一條同色三角骨褲，仲要除極都除唔到條褲，真係俾佢吹脹！之後，搵嚟同佢對打嘅「人」，亦只不過係一個唔會郁嘅假模特兒，成場就只係得佢帶住個波走嚟走去以進行測試。不過呢，佢又唔係完全得啖笑，會對波鞋唔同位置進行評論，好似佢話鞋筒高度設計得非常舒適，感覺似著住low-cut一樣等等，想睇反傳統嘅球鞋評論，Brad Hall係唔錯推介。