每個月，報紙、雜誌、網站、店舖，咁多嘢買，老實講，點會睇得晒，更加唔想揀；有見及此，MenClub每月將為大家精挑10樣單品，務求大家唔使諗之餘，又買到好嘢。

01. Filling Pieces Red Sneakers

今年興紅鞋，唔知大家知唔知，其實原因有二：其一係Kanye West（美國著名rapper）幫Nike設計咗對Nike Air Yeezy Red October，被瞬間炒到5皮；結果全世界嘅窮撚走咗去幫襯馬雲，喺淘寶喪淘假貨（大約600 RMB 一對）；其二係之前網上有段捉姦在床片，踢竇主角老友數臭姦夫「着紅鞋」，令網民邊剝花生邊拍手掌。兩件事令紅鞋在市場上極度吃香，例如Balenciaga同Supra款式都非常缺貨。所以，今日想介紹的係呢對Filling Pieces鄒布波鞋，來自阿姆斯特丹嘅佢，好明顯無前者們咁出名，不過話晒都係紅鞋，而且個款都呃得下人，相比之下又唔係貴，所以絕對值得成為本月Best Pick。（$2,740）

Shoplist：www.oki-ni.com

02. Thom Browne iPhone 5 Case

只要用心，我相信無乜人唔會留意到市面上最多人用嘅兩款電話殼（iPhone為主）係假嘅Chanel香水樽，同埋Moschino扮麥當勞薯條嘅case；講真，其實同咁多人撞case，一定唔係有型事。有型嘅第一大規條，就係唔實際，所以本月Best Pick，Thom Browne嘅iPhone 5 case有份入圍，原因係佢的確好有型：黑皮配紅白藍法國國旗tag；而且保護功能一流，當你成部電話插咗入去之後，係會將「mon」同背面都遮住晒，肯定以後同女朋友食飯，唔使再俾佢鬧你成日玩電話。唔實際之中，反而多番一啲人同人之間嘅交流，有度過嘅。（$1,960）

Shoplist : www.oki-ni.com

03. Globe-Trotter Special Edition 21" Carry-On Case

好多傻仔（包括筆者）以為攞住個 Rimowa 銀色喼，貼晒貼紙，就係有型；其實識玩，一定唔會買 Rimowa。真正有型人，買嘅係Globe-Trotter，一個喺1897年成立嘅英國品牌，專門出皮喼。（其實之前如果有留意吓娛樂新聞，就會知余文樂同吳雨霏嗰時拍拖去完英國返嚟，就係一人買咗兩個返嚟。）不過，買呢個喼有一個問題，就係如果你個喼成皮嘢，但你坐Econ，感覺就好似你用唔起個喼咁，所以呢樣嘢都係留番俾大家自己去衡量。講真，你睇下Rimowa歷史都算悠久，1898年開設，但就係比Globe-Trotter遲一年，有啲嘢差少少，就係差嗰少少。（$10,280）

Shoplist：www.mrporter.com

04. D R Harris Arlington Kit

近年開始，男士美容好似愈來愈普遍，不過始終本身夠靚仔或者有錢，都係玩晒，所以好似筆者呢啲窮毒撚，一向都少理。但某次去到一個男仔friend屋企，借用佢洗手間，發現佢用緊一套好誇張吓嘅美容護理kit，於是我忍唔住問佢：「喂，乜你基㗎咩，用埋晒啲女人嘢。」佢語重心長咁答我：「唔怪得知你溝唔到女啦，你知唔知，廁所入面嗰set嘢，係愛嚟擺，每次識咗一個女仔，最緊要帶佢返屋企，等佢去廁所之際見到你嗰set嘢，佢就會覺得你好有lifestyle，之後就會對你加分，繼而畀你食。」起初我都唔信，不過見佢食女嘅數目不斷倍增，我唯有相信佢講嘅嘢係真。冇錯，就係圖中呢set D R Harris，入面有洗面膏、鬚刨、鬚後水、掃，堪稱「現代溝女四寶」，要有。（$1,740）

Shoplist：www.mrporter.com

05. Shoes Master Vol. 21 Magazine

一年兩本，主要介紹當今球鞋界有咩勁，有咩值得炒，基本上就係波鞋天書，由日本仔創作，已經知唔會欺場。今期封面係Nike x Supreme Foamposite，唔識唔緊要，買本睇下，都係$100都唔使，買咗收益嘅係我哋班編輯，因為當你哋有更多球鞋嘅基本常識，我哋每次寫波鞋，個感覺就唔使咁離地。明無？（$98）

Shoplist：store.hypebeast.com

06. Eason Chan's《Rice & Shine》

當全世界都鍾意標榜自己鍾意聽Radiohead、Armin Van Buuren、Imagine Dragons呢啲咁有型嘅音樂時，我就成日都同日講自己係聽Cantopop，而且係Twins比較多。唔係好明，大家都係咁成長，聽嗰啲歌大，點解大大下，會覺得7，所以扮無鍾意過佢哋。可能陳奕迅係唯一例外，即時主要聽外國歌嘅人，都總會聽下佢啲碟，近年個個都話咩「A餐B餐」，其實我覺得做Eason最慘，壓力又大，又成日被人小，聽聽佢新碟入面嘅《娛樂天空》，可能你都會感受到佢嘅無奈。陳奕迅，冇得傾，唔係本月，係本年必買嘅CD。（$110）

Shoplist：HMV 中環畢打街1-3號中建大廈1樓（2739 0268）

07. Kate Moss by Mario Testino

Kate Moss，大家都識，英國超模，同過Johnny Depp一齊。Mario Testino係邊個？總之係一個好鏈頸嘅攝影師，專影時裝同明星，只要有佢個名，都係大單嘢嗰隻。兩條友一齊影咗一堆相，之後好明顯要出番本書啦，本書有超過100張黑白同彩色相，仲有兩位嘅自序同一啲感想。原來Mario一路都當Kate係繆斯，所以想出番本書向佢致敬，同令更多人認識Kate嘅另一面。點解你要買？啲相J-able，而且網上冇得download，講完。（$320）

Shoplist：www.urbanoutfitters.com

08. Bamford Deepsea Predator

明眼人會記得MenClub一排之前，已經介紹過呢隻錶，係英國一間專門幫人customize Rolex同其他名錶嘅公司，Bamford Watch Department出嘅Sea-Dweller，不過當時冇得買，而家大家有福啦，只需二十萬，就可以買一隻「應該唔會同人撞」嘅Rolex。講真，香港地，用得二十萬買一隻全黑，而且睇唔到個樣乜滯嘅錶，唔會有幾多個人。再者，買得呢啲款，都唔需要知道隻錶本身嘅功能同歷史，總之我帶住行出來，就係要個個都知我好很疊，MenClub 收入最高嗰班朋友仔，請對號入座。（$202,080）

Shoplist：www.bamfordwatchdepartment.com

09. FEIT Bund Watch Strap

唔使驚，唔係想介紹你買圖中隻錶，係想講下條錶帶啫。錶帶等同包皮，好多人以為好唔重要，我諗每個人身邊都總會有一兩個冇割包皮嘅朋友，結果大個因為發炎種種的問題，先要去割，結果痛不欲生；錶帶，雖然未至於要令你施手術，不過其重要性同割包皮一樣大。你諗下，有幾多人真係買得起啲網呀，啲雜誌寫嘅靚錶，個個都望塵莫及，心理好唔平衡，但其實你求其買隻Seiko或者Timex，將佢換番條靚仔啲嘅皮錶帶，件事都即刻唔同晒，肯定有啲無知少女會走埋嚟話條錶帶好得意，話唔定睇睇下，會想睇埋你條包皮，都話兩者關係好密切㗎啦！（$1,130）

Shoplist： www.feitdirect.com

10. Google Glass

不解釋。（$12,000）

Shoplist：www.google.com/glass/start