二手錶店遷徙

有本地的二手錶店業人士表示，過去大半年彌敦道一帶商場的租金急漲，有見廣華街一帶地舖的租金明顯有優勢，馬上「轉場」。

據Ken’s Watches及London Watch的負責人向我們表示，有見外面租金（例如彌敦道一帶的商場）愈來愈貴，加上見到仁安大廈地鋪已有約10間的二手或全新錶店，認為該地段已成二手錶客聚腳點，有穩定客源，遂決定遷入，希望「一齊做旺個市」。旺角有條「波鞋街」，好多亞洲，以至歐洲遊客都聽過，假以時日，旺角會否多一條「二手錶店街」？

香港人知窿路

仁安大廈室內地舖街雖然座落旺角幾十年，但始終屬邊緣地帶，而且真係「香港仔女」先至知。不過，錯有錯著，正因遊客不多，男士們可以慢慢隔住玻璃睇啱心水先行入舖。

另外，Ken’s Watches及London Watch的老闆都認為，內地客來港買錶，仍然主打新錶，箇中原因可能與消費文化及對二手錶選購知識不多有關，所以內地客自然不多。

港島MK大不同

玩錶儲錢有得威

唔熟悉腕錶文化，會覺得「玩錶」係老豆或阿爺嗰代嘅男人玩意，其實邊個年代嘅男人都愛「玩錶」，而錶亦係fashions，係潮物，二手錶一樣玩。

Ken’s Watches經理Gilbert認為市場上愈來愈多年輕人成為二手錶玩家，當中有相當數目的後生仔自知「難剩錢」，索性一次過或以分期形式購買具保值能力的型號，既能儲錢，亦可以威吓開心吓。筆者也認識同事靠「買錶儲錢」及購買基金，於33歲儲夠買樓首期。想快啲「上車」？大家不妨考慮。

勞力士永遠贏家

講到保值能力高的二手錶，好多人即時想到勞力士（Rolex），據London Watch的Pierre表示，勞力士除能夠在二手錶巿場屹立多年不倒，固然與機芯設計耐用可靠，「好多行咗幾十年，狀態仍好穩定」，而且實用性高。另外，廠方完善的售後服務也應記一功。「即使冇晒出廠時的文件，只要到廠方屬下的維修中心就幫你整，年代久遠的都幫到手。」

新手入門冇得懶

雖然好多人第一隻勞都會揀新錶，主要因為對二手錶知識不多，所以冇信心。如果你對二手錶有興趣，建議你無需心急，多啲做吓功課先，起碼要了解吓心水型號的資料背景，又或上網「刨文」，聽多啲讚同彈嘅意見。如果自問「彈藥」有限，諗住玩完一隻換一隻，最好都係選擇巿場上受歡迎的型號，一來較保值，二來易放售。當然，最好到商譽較佳的二手錶店幫襯啦。