爆芒之痛可能唔少人都試過，即使現時市面上號稱具「自我修復」功能嘅手機，一般都只能防刮而已。最近東京大學就研究出新型玻璃，可以自行修復裂痕，唔使再驚「一失手成千古恨」。

東京大學教授Takuzo Aida在網上發表研究報告，指研究出一款全新的自動修復玻璃「polyether-thioureas」，只要用手擠壓裂痕兩邊，就可以於室溫下修復裂痕，不需再加熱，而且堅硬如故。報告指，過往嘅物質需要加熱至120°C才可以重組斷裂部分，修補裂口。今次嘅新材質既可以喺室溫下自行癒合，硬度亦適合用作手機屏幕。

發現呢款新型玻璃嘅係一位畢業生，佢原本準備緊一種膠水，誤打誤撞就研發出新物質。佢希望呢款玻璃可以成為新環保物料，就算爛咗都唔使立刻扔。加州大學早前亦研發過一款聚合物，可以拉大50倍，亦可以在24小時內修補裂痕，有望成為下一代爆芒救星。

來源：Science Mag