電動車可以話係未來汽車發展嘅大勢所趨，不過現時電動車發展竟遇上一個大問題，就係「汽車電池礦物短缺」！據《Reuters》報道指出，電動車生產商Tesla電池金屬供應經理Sarah Maryssael 喺一場與監管機構、議員及礦商進行嘅閉門會議中表示，受到礦業投資不足所影響，Tesla 預計未來銅、鎳等電動車電池金屬會出現供應短缺。

報道中指出，電動車嘅銅用量係傳統汽車嘅兩倍，而除咗電動車外，發展日新月異嘅科技進步都帶動推升銅用量。根據英國建築服務研究與信息協會(BSRIA)報告預計，全球智能家居系統嘅銅消費量將由目前3.8萬噸增長至2030年嘅150萬噸， 再加上礦商喺銅業中多年投資不足，難怪令Tesla 憂慮電動車電池會出現短缺。

另外，Tesla電池金屬供應經理Sarah Maryssael 引述公司創辦人兼CEO Elon Musk 嘅計劃指，公司將會專注於使用更多鎳及較少鈷作電動車電池生產原材料，因全球的鈷供應量有70%嚟自於剛果，而剛果被批評允許童工參與鈷礦開採。此外，電動車上所使用嘅鎳錳鈷(NMC)電池逐漸由第一代材料比率為1:1:1嘅「NMC 111」電池，轉為更高鎳含量嘅鎳錳鈷電池，包括「NMC 532」、「NMC 622」及「NMC 811」等，令電動車電池嘅鎳使用量提高。 

來源：Reuters