據《Financial Times》報道指，全球擁有15億用戶嘅通訊應用程式 WhatsApp 證實被黑客入侵，而黑客係透過應用程式漏洞於 WhatsApp 語音通話功能置入監控軟件，目前仲未知有幾多用戶受影響。WhatsApp 表示，應用程式已經喺上星期五(11日)推出咗軟件更新，並呼籲全球15億用戶盡快更新。

報道指出，入侵 WhatsApp 嘅間諜程式「Pegasus」由以色列公司 NSO Group 開發，而 WhatsApp 用戶透過 iOS 及 Android 版 WhatsApp 嘅語音通話功能致電其他用戶，即使對方無接聽電話間諜程式「Pegasus」都可以透過漏洞傳播至對方手機上，而「Pegasus」一旦成安裝後有關通話記錄會自動消失，令唔少用戶喺不知情下成為受害者。

WhatsApp 表示，關於應用程式漏洞細節目前尚未清楚，不過呢個漏洞已經被發現咗幾個星期，，而調查仍處於初步階段，所以目前無法估計有幾多手機被攻擊。其中喺 WhatsApp 嘅公告中指出，以色列公司 NSO Group 與政府合作提供間諜軟體，同時有報道指呢啲間諜程式可以接管移動操作系統不少功能。

來源：Financial Times