相隔6年 Apple 終於推出新一代桌面主機電腦 Mac Pro，新 Mac Pro 一改上一代嘅垃圾桶外型設計，睇起上嚟更似 Power Mac G5 嘅長方體金屬主機外型。新 Mac Pro 係目前 Apple 性能最強大嘅電腦，用上咗 Intel Xeon 處理器等配件；同時 Apple 亦推出咗全新 Pro Display XDR 顯示屏，解像度達到 6K，而且轉向支架可以將顯示屏橫置或垂直放置。

全新機箱佈滿散熱孔  網民指似芝士刨

先講講新 Mac Pro 先，一改以往垃圾桶外型後 Mac Pro 用上咗佈滿散熱孔嘅不鏽鋼機箱，不過有網民就覺得新設計比較似金屬芝士刨。究竟點解新 Mac Pro 有咁多個窿？其實呢啲都係為散熱而設嘅氣孔，因為 Mac Pro 用上咗達 1400W 嘅超強火牛，使用時令到機上內嘅溫度非常高，所以呢啲氣孔可以增加空氣喺機上內嘅左右對流，提高 Mac Pro 嘅散熱表現。

性能極致  可同時剪輯8條 8K 影片

除咗講外型，當然都要講講內涵！今次 Mac Pro 用上咗最新嘅 Intel Core Xeon 處理器，最多達到 28 核心；而記憶體可用 2933MHz ECC RAM，12條RAM打爆記憶體達到 1.5TB ，容量可以仲高過你同我屋企部電腦嘅 HDD。

顯示卡方面，新 Mac Pro 用上咗號稱全球最快嘅 Radeon Pro Vega II 顯示卡，提供高達 128 HBM2 視訊記憶體，最多可以同時處理8條 8K 影片或12條 4K 影片；而喺發布會中新 Mac Pro 示範同時剪輯1000個音軌嘅音樂製作，完全能夠同步處理。

機箱設可抽式設計  方便更換配件

另外，Apple 為咗方便用家對新 Mac Pro 進行升級，喺機身頂部加入咗可抽式設計，用家只要喺機箱頂部抽出手柄並扭動，就可以將整個機箱外殼拉起，以便更換電腦配件，

而新 Mac Pro 嘅機箱底部設置咗滾輪，方便用家可以隨時移動主機，不過連機頂兩邊手柄睇，新 Mac Pro 就有啲似飛機餐車喇！

新 Mac Pro 售價由美元$5,999起，即約港幣$47,000，將於今年秋季推出。

除咗新 Mac Pro 外，Apple 繼8年嘅 Thunderbolt 顯示器後，再次推出自家顯示器 Pro Display XDR！呢個全新顯示器外型設計與新 Mac Pro 如出一轍，機背同樣佈滿散熱孔。

解像度達 6K  最高提供 1,600 nits 亮度

Pro Display XDR 係專為多媒體工作者而設嘅顯示器，佢用上咗窄邊框設計，螢幕大小為32吋，解像度達到 6K 嘅 6016 x 3384。此外，顯示器仲提供 P3 和 10-bit 寬色域顯示支援，能夠提升色彩準確度。

而 Apple 為咗令用家可以更清晰睇到螢幕畫面，Pro Display XDR 提供最高 1,600 nits 嘅亮度，以及可以不限時以 1,000 nits 亮度顯示。不過高亮度亦為顯示器帶嚟高溫問題，所以佢嘅機背用上咗同 Mac Pro 機箱一樣嘅金金屬導熱設計，可以透過多個散熱孔帶走機身熱力。

另推出轉向支架  支援顯示器縱向擺放

Apple 同時為 Pro Display XDR 推出咗轉向支架，顯示器安上支架後可以隨時拉上拉落，及顯示器旋轉至縱向模式，不過轉向支架就要額外購買，售價達到美元$999。Pro Display XDR 同時提供基本版及「納米紋路」玻璃版本，「納米紋路」可以令螢幕防反光效果提升，但唔會令清晰度下降。

Pro Display XDR 售價為美元$4,999，約港幣$39,000，而「納米紋路」版售價為美元$5,999，約港幣$47,000，與新 Mac Pro 同樣將於今年秋季發售。