Apple 噚日喺 WWDC 2019 中發布咗新一代桌面主機電腦 Mac Pro，新機外型重新用上類似 Power Mac G5 嘅長方體金屬設計，不過滿佈機箱嘅散熱孔被唔少網民認為似芝士刨。香港 IKEA 噚晚都喺 Facebook 出 Post 抽下水，表示「認住我！就唔怕之後喺新電腦上面磨芝士！刨蘿蔔！」，有網民喺 Post 中改圖留言發揮創意。

Apple 推出嘅 Mac Pro 可以話每次推出都會被嘲笑外型設計，繼6年前嘅垃圾桶設計後，今次就似足芝士刨。香港 IKEA 反應都非常快，噚晚喺 Facebook 專頁中出 Post 抽抽水，仲喺內文中指出「IDEALISK刨磨器正式登場！佢嘅手把定位，可以避免食材刨出界。唔同形狀嘅出口位，仲能夠快速處理食材，刨出你鍾意嘅厚薄片狀，被譽為繼書本、筆記、西瓜之後，第四樣最好刨的物品。」

而 Post 內有網民用心改圖，將 Apple 嘅新 Mac Pro 及 IKEA 芝士刨 加入產品名稱及售價，製作對比圖。

另一網民就用上 iPad 加芝士刨，以最快捷及低成本嘅方式製作出平民版嘅 Mac Pro 及 Apple 另一全新顯示器 Pro Display XDR。

來源：Facebook