科幻電影一定會出現嘅情節，當然係咩生化人、機械人代替人類工作，但你以為佢真係電影情節？日本政府就唔係咁諗！根據日本政府內閣府旗下「Moonshot研究開發計劃」最新公佈嘅目標，就係於2050年前於日本實現人類身體、腦及時空嘅大解放！

首先為咗證明我唔係亂吹，呢個係日本政府網站內有關計劃嘅頁面，而呢個係一份長到我唔想睇嘅30頁英文計劃書。簡單啲黎講，呢個計劃嘅背景係面對少子化、高齡化以及人均壽命越黎越長等情況，為咗保持社會勞動力、提升生活水平，日本政府早年已提出「Society 5.0」，即超智慧社會嘅概念。而呢個「人類解放計劃」就係達至「Society 5.0」嘅方法，亦即於2030年前由依家嘅指紋認證發展到腦部直接控制機器嘅「腦機介面 (BMI) 」，達成人腦解放；由依家嘅工業用機械人，發展到人工肌肉或機械外骨骼，達成人體解放；再由依家嘅VR、AR，發展到Teleprsence (網真)，以達到時間、空間解放。最後願景係去到2050年，一個人能夠同時遠程操作多個機械人，達成社會革新。

2050年距離依家話長唔長，話短唔短，如果真係按計劃進行，相信我哋大部份人都有機會見證嗰一日來臨，到時唔知又會係一番點嘅光景呢？