大家記唔記得早年有個都市傳說，話某間快餐店賣嘅炸雞唔係一隻真正嘅雞，而係只有雞脾雞翼雞胸、冇毛冇頭冇骨嘅「基因雞」？多年之後呢個都市傳說即將成真——幾乎啦下。新加坡政府日前批准美國企業Eat Just於當地販賣「實驗室培植雞肉」，成為全球首個批准販賣培植肉嘅國家。

示意圖

要注意，培植肉與近年興起、快餐店都有嘅「植物肉」係兩樣好唔同嘅事。植物肉基本上係「齋燒鵝」，原理係用啲唔係肉嘅嘢扮做肉；而培植肉係真係肉，只不過佢唔係由動物上身而來，而係由實驗室以動物幹細胞培植出黎。據《CNN》報導，Eat Just製造嘅培植肉將會先於一間特定餐廳中，以雞塊 (類似X樂雞)形式出售，並計劃將來販售到其他餐廳或零售平台。

Eat Just 目前亦有推出植物蛋

目前Eat Just於新加坡及美國加州都有生產培植肉嘅廠房，但就只有新加坡准許佢販賣培植肉。而除咗雞肉，未來亦希望將培植牛肉推廣至歐美市場。