現時主流嘅作業系統Windows 10自2015年推出至今將近6年，由剛推出嗰陣被人鬧多Bugs同唔穩定，經歷N次版本更新變到今時今日嘅模樣。最近Microsoft就宣布，將於6月24日發布下一代Windows系統，並聲稱係近十年嚟最大一次更新。雖然未知新系統係重新設計嘅Windows 10定抑或係所謂嘅Windows 11，但相信新系列將會完全改頭換面。

綜合外媒報導，Microsoft CEO Satya Nadella喺上周「Build」開發者大會就透露過，Mircrsoft過去幾個月都測試緊新作業系統，並表示新系統視覺效果及用戶界面都會有明顯變化，同時可以令開發人員及創作者帶嚟更多開發空間同商業機會。似乎暗示現時嘅「Windows Store」將會嚟個大改新，等開發人員更容易推出應用程式畀消費者，外界亦猜測「開始menu」、「檔案管理員」、「任務欄」等常用功能將會有更現代化嘅外觀。

另外，Microsoft亦喺上個月證實，專為雙螢幕裝置設計嘅Windows 10X將會停止開發，並會將大部份技術引進到其他Windows產品，所以預計下一代Windows將會有更好嘅雙螢幕功能。至於仲有咩新功能加入，就請大家就拭目以待吧！

資料來源：theverge、cnet