浩瀚無際嘅宇宙入面存在數之不盡嘅星球，地球只係宇宙入面嘅一粒塵埃，但渺小嘅人類從未放棄過探索太空嘅夢想，深信有日可以了解整個太陽系以至全宇宙。美國太空總署 （NASA） 於今日宣布即將展開兩項金星任務，預計喺2028至2030年發射兩個探測器到金星，以研究該行星大氣及地質特徵，幫助人類進一步了解金星演變過程。今次亦係NASA繼1990年麥哲倫號金星探測器任務後，人類再次探索金星。

（圖片截自：NASA）

據了解，兩項任務分別名為「DAVINCI+」及「VERITAS」，各獲NASA「Discovery Program」計劃斥資5億美元。「DAVINCI+」主要負責收集金星大氣組成成份，以了解金星形成及演變，並研究金星係咪曾經有過海洋。而「VERITAS」就負責從軌道上拍攝及繪製金星表面地圖，幫助人類了解金星地質歷史，並確認當地火山及地震活動仍否活躍。

（圖片截自：NASA）

雖然金星貴為最接近地球嘅行星，但星球環境就相當之惡劣，除咗大氣層有96%都係二氧化碳之外，其表面溫度更高達471度，足以融化鉛塊，間唔時仲會落硫酸雨。有科學家就認為金星曾經存在適合孕育生命嘅海洋，只係因某啲原因而引發極端溫度效應，導致全部海水蒸發。雖然聽落就好似係一個唔適合人類居住嘅「地獄」行星，但唔排除星球上可能會有某式形式嘅微生物能夠生存，相信今次任務會有助人類揭開金星更多未解之迷。

資料來源：NASA、The Verge