隨住串流平台出現，大家睇電視嘅習慣漸漸從「追劇」變成「煲劇」，已經再冇要趕住返屋企睇電視呢支歌仔唱。最近美國市場調查公司Nielsen發表最新報告，發現美國民眾喺電視上睇串流平台嘅時間足足佔咗整體嘅四分之一，換言之每日睇4個鐘電視嘅人，有一個鐘係睇緊串流平台，而當中最多人睇嘅串流平台就係Netflix同Youtube。

從圖表可以睇到，美國民眾64%電視時間用於觀看傳統廣播及有線電視節目，26%時間花費喺觀看串流平台，當中就包括Youtube、Netflix、Hulu等等知名平台，剩低個9%就係打機、睇DVD等其他用途。

雖然對比起傳統有線電視，26%仍然係一個小數目，但據《紐約時報》報導，串流平台時間佔比從上年嘅20%躍升至現時嘅26%，更預計今年年底會提升到33%，可見串流平台發展潛力無限，難怪近年一眾傳統電影片商都先後推出自家串流平台分一杯羹。

資料來源：The Verge、紐約時報