隨住任天堂Nintendo Switch踏入第7個年頭，加上現時遊戲視覺效果越嚟越逼真，Switch嘅機能已經跟唔上時代發展，所以有關Switch 2（暫稱）嘅傳聞近年多得不可勝數。先前就有多方消息指，任天堂新一代遊戲機將於今年內問世，令唔少機迷倍感期待，但最近又有消息指，任天堂已決定將遊戲機推遲至明年發布。

據 《Bloomberg》、《VGC》及《Eurogamer》等多間外媒報導，好幾家遊戲發行商已收到任天生通知，原定今年年底登場嘅新一代Switch將推遲2025年3月發售，以確保新機推出時有足夠嘅遊戲陣容。對此，任天堂繼續守口如瓶，拒絕置評。

東京遊戲產業顧問公司Kantan Games執行長Serkan Toto認為，若然消息屬實，今年任天堂遊戲陣容將會相當枯竭，事關老任將會集中資源開發新一代主機大作，因此今年可能會見到好多舊作嘅重製版。除此之外，Serkan Toto亦預測新主機定價將為400美元，比當年Switch首發價299美元高出約100美元，而且遊戲有可能加價至70美元起，與PS5及Xbox Series X/S遊戲售價睇齊。