曾幾何時，擁有一部相機係唔少男人嘅最大願望。不過隨住電話嘅相機功能、性能都越黎越齊備，用落又更加方便，唔好講話買新相機，就算買咗你都未必會拎出黎用。而近日有日本媒體整理日本相機和影像產品協會（CIPA）及內閣府公佈嘅數據，發現日本數碼相機嘅出貨量於過去十年間暴跌近85%，而且年輕人擁有數碼相機嘅比率跌得特別誇張。

圖片：BCN Retail

日本媒體《BCN Retail》早前做咗個有關數碼相機銷情嘅專題報導，當中首先引用CIPA嘅數據，指出2014年時整個日本數碼相機業界總共出貨578.4萬台，但自此之後就快速下跌，到2018年時已經僅餘一半（284.6萬台）；進入2020年疫情時數字再砍一半，為129.5萬台。到去年時整個日本數碼相機業界嘅出貨量只餘91.2萬台，比起2014年大跌85%。

報導指出社交媒體嘅興起，雖然令「影相」嘅整體需求上升，但亦令大家轉向更為方便嘅智慧型手機，所以相機業界根本無法從中獲得任何好處。

圖片：BCN Retail

同樣地，日本內閣府公佈嘅消費動向調查亦佐證此說法。2014年時，數碼相機於日本嘅普及率為64.2%，即係每三個人中就有兩個擁有數碼相機；但到2023年普及率就下跌至41.5%。如果分年齡段黎睇，數據就更加得人驚。縱然普及率於所有年齡均有下降，但30代（31至39歲）及29歲以下組別嘅普及率分別由2014年嘅81.3%及69.5%，跌到去年嘅33.1%及18.2%，各自跌咗約50個百份點。可見年輕人已經唔會再買數碼相機。或者不久嘅將來，就會開始有知名大廠退出呢個黃昏市場啦。

資料來源：BCN Retail