OpenAI上週末宣佈向全球推出最平價嘅ChatGPT訂閱計劃「ChatGPT Go」，月費僅8蚊美金就可以享有比免費版多10倍嘅使用額度，雖然使用時會有廣告，但相信仍會係唔少普通用家嘅首選。

圖片：OpenAI

ChatGPT GO去年於印度市場首先推出，隨後慢慢推廣至全球超過170個國家及地區，到上週五時OpenAI正式宣佈會將ChatGPT Go推向全球。據OpenAI上週發出嘅公告，ChatGPT Go會有更大嘅記憶容量，換言之佢可以記得更多之前嘅對話，提供更為個人化嘅答案。

ChatGPT Go用家於「對 GPT-5」、「影像生成」、「檔案上傳」以及「進階資料分析」亦會有「延伸使用額度」，不過大部份項目都無清楚講明具體上會多幾多。目前唯一有提供準確數字嘅，就係ChatGPT Go用家使用GPT-5.2 Instant嘅額度會比免費用家多10倍。目前免費用家每5個鐘就可以用GPT-5.2 十次（然後就會自動轉用mini版本），而再上一級嘅ChatGPT Plus用家就每3個鐘有160次。

圖片：OpenAI

又平又正當然係有代價。OpenAI同步宣佈，會先於美國等地試行於免費版及ChatGPT Go內推送廣告，未來將會推廣到全球嘅免費及ChatGPT Go用家，而Plus及Pro用家則不受影響。同時ChatGPT Go亦不包含舊模型（如4o）、深度研究、代理模式與 Sora 影片生成功能等進階工具。換言之ChatGPT Go比較適合用量較大嘅日常用家，如果想有更進階嘅功能，應該都係Plus或Pro更為適合。

當然，對本地用家最重要嘅，就係香港不屬於ChatGPT Go（乃至整個ChatGPT）嘅適用地區。換言之大家都係要靠VPN先可以用到。

資料來源：OpenAI