婚外情真係一啲都唔罕見，就算你自己冇呢個經驗、朋友冇呢個興趣，都一定有睇過藝人、名人嘅婚外情新聞。每次我睇到都會心諗：點解啲男人要咁做？更重要嘅係點解做第三者嘅女人又肯？日本女性八卦離誌《日刊SPA！》就訪問咗幾位喺呢方面頗有經驗嘅陪酒小姐，剖析處於婚外情嘅男女究竟點解要咁做。

今年35歲嘅陪酒小姐Akina一針見血咁話：「男人婚外情係為性慾，女人婚外情就係真心」。佢話佢認為婚外情非常簡單，就係男人想搵個新鮮對象時，如果正正常常咁去追個女仔一定會被拒絕，於是就會講出「我鍾意你多啲」、「我老婆唔理我…」之類嘅說話，結果就會氹到女人落嗒，雙方陷入婚外情。

但另一邊廂，佢有個已婚女性朋友就於一次同學會中，與舊同學見面後發展成婚外情，個女仔話已經唔愛佢老公，甚至已經幻想緊啲細路長大後就離婚，同婚外情對象結婚。而佢亦唔介意於社交網站上直接Post與婚外情對象約會嘅相，根本就唔Care老公會唔會發現。可見佢係真心嘅。

至於今年37歲嘅Rina就話，睇新聞見到啲男藝人嘅婚外情對象都係啲廿令歲嘅女仔，證明年輕人根本唔知做人第三者後果有幾嚴重。佢話自己讀大學時都曾經與客人陷入婚外情，當時佢都唔覺得有咩問題。陷入婚外情嘅女性會因為男人話鍾意佢多過鍾意老婆而開心，就算被正印發現，都覺得大不了低頭認錯就可以解決，只係當一場遊戲。

直到佢本人28歲結咗婚，然後發現自己老公有多個婚外情對象，佢嬲到即刻離婚。雖然好在當時冇小朋友，佢亦拎到一筆贍養費，但佢就認為呢啲可能係自己以前人第三者嘅報應。

簡單啲黎講，兩位陪酒小姐認為男人無論係搞婚外情、定係成為第三者，都係因為_痕；女人搞婚外情可能係真心，但成為第三者就係蠢。但願大家身邊都唔好發生呢啲事啦。

資料來源：日刊SPA