近排天氣開始涼，有時行行下街覺得凍，係咪好想可以拖住你心愛嘅人隻手，感受下對方嘅體溫？廢話，想就緊係想架啦，問題係我有冇心愛嘅人，心愛嘅人隻手又係咪我拖到先得架大佬呀！但又唔使怕呀，因為科技可以幫到你。日本岐阜大學研發嘅呢個「散步中的女友」裝置，就可以令你唔需要有女友，都可以擁有拖住女友出街嘅感覺。

圖片：itmedia

係，呢個「散步中的女友」，就係一隻痴喺你條手臂內側、有一大抽電線嘅假手，個樣係就係樣衰啲，但功能上佢絕對能夠滿足你嘅需要。首先你有隻手可以拖先啦，而隻手就係用軟膠製成，據說個觸感同人手非常相似，而且入面仲有膠片式發熱器，令隻假手能夠有體溫。另外入面亦有壓力感應器，你捉佢捉得實啲，佢又會捉你捉得實啲，分分鐘煙韌過同真人拍拖呀。

圖片：itmedia

未完架，於膠片式發熱器同啲軟膠之間，仲有位可以攝塊濕布入去。有咩用？就係用黎營造緊張出手汗嘅反應，而且塊布唔一定係濕水，你加香精等落去一樣都得，咁你唔止Feel到佢嘅手汗，仲可以聞到體香。而且話到明係「散步中的女友」，咁兩個人手拖手行個步伐唔一定一致架嘛，咁隻手咪會拖黎拖去囉，所以「散步中的女友」都加入相關旋轉機制，令你感受到拖住女朋友行嘅手感，仲可以配合你嘅速度播出腳步聲、衣服磨擦聲、呼吸聲！

圖片：itmedia

據報，呢隻手除咗滿足「冇手拖」嘅慾求不滿之外，仲可以減輕孤獨感，同時因為佢令你有行路嘅動力，所以可以改善運動不足。其實只要搵個殼裝返靚啲，又或者加入其他功能 (咳嗯)，又未必冇市場喎。

資料來源：itmedia