唔少人閒時都有玩下交友App，不過大家應該都聽過「交友App勿認真」，所以大部份人都係用玩玩下嘅心情去用交友App。但根據日本近日嘅一份報導，原來日本人不單止非常熱衷於使用交友App，而且唔少人仲喺上面搵到人生伴侶，結果有近1/4嘅新婚夫婦，都係於交友App上認識。

據日本《ANN》報導，日本每年新婚夫婦中，透過交友App認識嘅比例自2017年起就慢慢增加，特別係自2020年疫情開始後，透過交友App認識而結婚嘅新婚夫婦比例就升到16-18%，去到今年數字更加升到22.6%，亦即係話2022年每五對新婚夫婦中，就有一對係透過交友App認識，比起透過學校或工作認識嘅比例仲要高，完全打破「交友App勿認真」嘅迷思。

背後嘅原因，當然係因為疫情令大家減少社交活動，同時更多人轉向使用交友App，此消彼長之下就令交友App成為認識新朋友嘅熱門之選。另一邊廂，日本民眾接受訪問時亦指，透過交友App，比起用傳統方法更容易認識到志趣相投嘅人，所以係搵另一半嘅好方法。

同一時間，因為疫情關係，日本新婚夫婦嘅計畫亦有所改變。據報以往有超過8成嘅新婚夫婦，會於結婚後進行蜜月旅行，不過自2020年疫情開始，數字就大幅減少到32.5%；但你又唔好以為日本啲夫婦好唔開心喎，因為據日前11月22日，日本夫婦日進行嘅調查，有超過8成嘅夫婦受訪者表示，就算去到下一世都會選擇同對方結婚，換言之佢哋對於婚姻生活係感到滿足嘅。

資料來源：ANN